181. සන්ධිං කත්වා අමිත්තෙන අණ්ඩජෙන ජලාබුජ,
විවරිය දාඨං සෙසි කුතො තං භයමාගතං.

182. සඞ්කෙථෙව අමිත්තස්මිං මිත්තස්මිම්පි න විස්සසෙ,
අභයා භයමුප්පන්නං අපි මූලානි කන්තතී’ති.

183. උපසාළ්හකනාමානං සහස්සානි චතුද්දස්ස,
අස්මිං පදෙසෙ දඩ්ඪානි නත්ථි ලොකෙ අනාමතං.

184. යම්හි සච්චඤ්ච ධම්මො ච අහිංසා සංයමො දමො,
එතදරියා සෙවන්ති එතං ලොකෙ අනාමතන්ති.

185. අභුත්වා භික්ඛසි භික්ඛු න හි භුත්වාන භික්ඛසි,
භුත්වාන භික්ඛු භික්ඛස්සු මා තං කාලො උපච්චගා.

186. කාලං වොහං න ජානාමි ඡන්නො කාලො න දිසස්ති,
තස්මා අභුත්වා භික්ඛාමි මා මං කාලො උපච්චගාති.

187. සෙනො බලසා පතමානො ලාප ගොචරඨායිනං,
සහසා අජ්ඣප්පත්තො මරණං තෙනුපාගමි.

188. සොහං නයෙන සම්පන්නො පෙත්තිකෙ ගොචරෙ රතො,
අපෙතසත්තු මොදාමි සම්පස්සංමි අත්ථමත්තනොති.

189. යො චෙ මෙත්තෙන චිත්තෙන සබ්බලොකානුකම්පති,
උද්ධං අධො ච තිරියඤ්ච අප්පමාණෙන සබ්බසො.

190. අප්පමාණං හිතං චිත්තං පරිපුණ්ණං සුභාවිතං,
යං පමාණකතං කම්මං න තං තත්රාවසිස්සතී’ති.

191. නායං පුරෙ උන්නමති තොරණග්ගෙ කකණ්ටකො,
මහොසධ විජානාහි කෙන ථද්ධො කකණ්ටකො.

192. අලද්ධපුබ්බං ලද්ධානං අද්ධමාසං කකණ්ටකො,
අතිමඤ්ඤති රාජානං වෙදෙහං මිථිලග්ගහන්ති.

අථ ඉන්දසමානසපණ්ණකුටි
සුසිමුත්තමගිජ්ඣජලාබුජකා,
උපසාළ්හකභික්ඛු සලාපවරො
අථ මෙන්තවරො දස උන්නමතීති.