3508. කස්ස සුත්වා සතං දම්මි සහස්සං දට්ඨු සොණකං,
කො මෙ සොණක මක්ඛාති සහායං පංසුකීළිතං.

3509. අථ බ්රවි මාණවකො දහරො පඤ්චචූළකො,
මය්හං සුත්වා සතං දෙහි සහස්සං දට්ඨු සොණකං
අහං සොණකමක්ඛිස්සං සහායං පංසුකීළිතං

3510. කතරස්මිං සො ජනපදෙ රට්ඨෙසු නිගමෙසු ච,
කත්ථ තෙ සොණකො දිට්ඨො තං මෙ අක්ඛාහි පුච්ඡිතො.

3511. තවෙව දෙව විජිතෙ තවෙචුය්යානභූමියා,
උජුවංසා මහාසාලා නීලොභාසා මනොරමා
තිට්ඨන්ති මෙඝසමානා රම්මා අඤ්ඤොඤ්ඤනිස්සිතා.

3512. තෙසං මූලස්මිං සොණකො ඣායති අනුපාදනො,
උපාදානෙසු ලොකෙසු දය්හමානෙසු නිබ්බුතො.

3513. තතො ච රාජා පායාසි සෙනාය චතුරඞ්ගියා,
කාරාපෙත්වා සමං මග්ගං අගමා යෙන සොණකො.

3514. උය්යානභූමිං ගන්ත්වාන විචරන්තො බ්රහාවනෙ,
ආසීනං සොණකං දක්ඛි දය්හමානෙසු නිබ්බුතං

3515. කපණොවතායං භික්ඛු මුණ්ඩො සඞ්ඝාටිපාරුතො,
අමාතිකො අපිතිකො රුක්ඛමූලස්මිං ඣායති.

3516. ඉමං වාක්යං නිසාමෙත්වා සොණකො එතදබ්රවි,
න රාජා කපණො හොති ධම්මං කායෙන ඵස්සයං.

3517. යොධ ධම්මං නිරංකත්වා අධම්මමනුවත්තති,
ස රාජ කපණො හොති පාපො පාපපරායනො.

3518. අරින්දමොති මෙ නාමං කාසිරාජාති මං විදූ,
කච්චි භොතො සුඛසෙය්යා ඉධ පත්තස්ස සොණක.

3519. සදාපි භද්රමධනස්ස අනාගාරස්ස භික්ඛුනො,
න තෙසං කොට්ඨෙ ඔපෙන්ති න කුම්භිං න කළොපියං
පරනිට්ඨිතමෙසානා තෙන යාපෙන්ති සුබ්බතා.

3520. දුතියම්පි භද්රමධනස්ස අනාගාරස්ස භික්ඛුනො,
අනවජ්ජපිණ්ඩො භොත්තබ්බො න ච කොචූපරොධති.

3521. තතියම්පි භද්රමධනස්ස අනාගාරස්ස භික්ඛුනො,
නිබ්බුතපිණ්ඩො භොත්තබ්බො න ච කොචූපරොධති.

3522. චතුත්ථම්පි භද්රමධනස්ස අනාගාරස්ස භික්ඛුනො,
මුත්තස්ස රට්ඨෙ චරතො සඞ්ඝො යස්ස න විජ්ජති.

3523. පඤ්චමම්පි භද්රමධනස්ස අනාගාරස්ස භික්ඛුනො,
නගරම්හි දය්හමානම්හි නාස්ස කිඤ්චි අදය්හථ.

3524. ඡට්ඨම්පි භද්රමධනස්ස අනාගාරස්ස භික්ඛුනො,
රට්ඨෙ විලුම්පමානම්හි නාස්ස කිඤ්චි අහාරථ.

3525. සත්තමම්පි භද්රමධනස්ස අනාගාරස්ස භික්ඛුනො,
චොරෙහි රක්ඛිතං මග්ගං යෙ චඤ්ඤෙ පරිපන්ථිකා
පත්තචීවරමාදාය සොත්ථිං ගච්ඡති සුබ්බතො.

3526. අට්ඨමම්පි භද්රමධනස්ස අනාගාරස්ස භික්ඛුනො,
යං යං දිසං පක්කමති අනපෙක්ඛොව ගච්ඡති.