2969. විකිණ්ණවාචං අනිගුය්හමන්තං
අසඤ්ඤතං අපරිචක්ඛිතාරං,
භයං තමත්වෙති සයං අබොධං
නාගං යථා පණ්ඩරකං සුපණ්ණො.

2970. යො ගුය්හමන්තං පරිරක්ඛණෙය්යං
මොහා නරො සංසති භාසමානො,
තං භින්නමන්තං භයමන්වෙති ඛිප්පං
නාගං යථා පණ්ඩරකං සුපණ්ණො.

2971. නානුමිත්තො ගරුං අත්ථං ගුය්හං වෙදිතුමරහති,
සුමිත්තො ච අසම්බුද්ධං සම්බුද්ධං වා අනත්ථවා.

2972. විස්සාසමාපජ්ජිමහං අචෙලො
සමණො අයං සම්මතො භාවිතත්තො,
තස්සාහමක්ඛිං විවරං ගුය්හමත්ථං
අතීතමත්ථො කපණං රුදාමි.

2973. තස්සාහං පුරිමං බ්රහ්මෙ ගුය්හං
වාචං හි මං නාසක්ඛිං සංයමෙතුං
තප්පක්ඛතො හි භයමාගතං මෙ
අතීතමත්ථො කපණං රුදාමි.

2974. යො වෙ නරො සුහදං මඤ්ඤමානො
ගුය්හමත්ථං සංසති දුක්කුලීනෙ,
දොසා භයා අථවා රාගරත්තො
පල්ලත්ථිතො බාලො අසංසයං සො.

2975. තිරොක්ඛවාචො අසතං පවිට්ඨො
යො සඞ්ගතීසු මුදීරෙති වාක්යං,
ආසීවිසො දුම්මුඛො ත්යාහු තං නරං
ආරා ආරා සංයමෙ තාදිසම්භා.

2976. අන්නං පානං කාසිකචන්දනඤ්ච
මනාපිත්ථියො මාලච්ඡාදනඤ්ච,
ඔහාය ගච්ඡාමසෙ සබ්බකාමෙ
සුපණ්ණ පාණූපගතාව ත්යම්භා.

2977. කොනීධ තිණ්ණං ගරහං උපෙති
අස්මිඤ්ච ලොකෙ පාණභූ නාගරාජ,
සමණො සුපණ්ණෙ අථවා තවෙව
කිං කාරණා පණ්ඩරකග්ගහීතො.

2978. සමණොති මෙ සම්මතත්තො අහොසි
පියො ච මෙ මනසා භාවිතත්තො,
තස්සාහමක්ඛිං විවරං ගුය්හමත්ථං
අතීතමත්ථො කපණං රුදාමි.

2979. න චත්ථි සත්තො අමරො පථබ්යා
පඤ්ඤාවිධා නත්ථි න නින්දිතබ්බා,
සච්චෙන ධම්මෙන ධියා දමෙන
අලබ්භමබ්යාහරතී නරො ඉධ.