1933. සම්පන්නං සාලිකෙදාරං සුවා භුඤ්ජන්ති කොසිය,
පටිවෙදෙමි තෙ බ්රහ්මෙ න නං වාරෙතු මුස්සහෙ

1934. එකො ච තත්ථ සකුණො සො තෙසං සබ්බසුන්දරො,
භුත්වා සාලිං යථාකාමං තුණ්ඩෙනාදාය ගච්ඡති.

1935. ඔඩ්ඩෙන්තු වාළපාසානි යථා බජ්ඣෙථ සො දිජො,
ජිවඤ්ච නං ගහෙත්වාන ආනයෙථ මමන්තිකෙ.

1936. එතෙ භුත්වා විවිත්වා ච පක්කමන්ති විහංගමා,
එකො බද්ධොස්මි පාසෙන කිං පාපං පකතම්මයා.

1937. උදරං නූන අඤ්ඤෙසං සුව අච්චොදරං තව,
භුත්වා සාලිං යථාකාමං තුණ්ඩෙනාදාය ගච්ඡසි.

1938. කොට්ඨන්නු තත්ථ පූරෙසි සුව වෙරන්නු තෙ මයා
පුට්ඨො මෙ සම්ම අක්ඛාහි කුහිං සාලිං නිධීයසි.

1939. න මෙ වෙරං තයා සද්ධිං කොට්ඨො මය්හං න විජ්ජති,
ඉණං මුඤ්චාමිණංදම්මි සම්පත්තො කොටිසිම්බලිං
නිධිම්පි තත්ථ නිදහාමි එවං ජානාහි කොසිය.

1940. කීදිසං තෙ ඉණදානං ඉණමොක්ඛො ච කීදිසො,
නිධිං නිධානං අක්ඛාහි අථ පාසා පමොක්ඛසි.

1941. අජාතපක්ඛා තරුණා පුත්තකා මය්හ කොසිය,
තෙ මං භතා භරිස්සන්ති තස්මා තෙසං ඉණං දදෙ.

1942. මාතා පිතා ච මෙ වුද්ධා ජිණ්ණකා ගතයොබ්බනා,
තෙසං තුණ්ඩෙන භාතූන මුඤ්චෙ පුබ්බෙ කතං ඉණං.

1943. අඤ්ඤෙපි තත්ථ සකුණා ඛීණපක්ඛා සුදුබ්බලා,
තෙසං පුඤ්ඤත්ථිකො දම්මි තං නිධිං ආහු පණ්ඩිතා.

1944. එදිසං මෙ ඉණදානං ඉණමොක්ඛො මෙ එදිසො,
නිධිං නිධානං අක්ඛාතං එවං ජානාහි කොසිය.

1945. භද්දකො වතයං පක්ඛී ද්විජො පරමධම්මිකො,
එකච්චෙසු මනුස්සෙසු අයං ධම්මො න විජ්ජති.

1946. භුඤ්ජ සාලිං යථාකාමං සහ සබ්බෙහි ඤාතිහි,
පුනාපි සුව පස්සෙමු පියං මෙ තව දස්සනං.

1947. භුත්තඤ්ච පීතඤ්ච තවස්සමම්භි
රතීව නො කොසිය තෙ සකාසෙ,
නික්ඛිත්තදණ්ඩෙසු දදාහි දානං,
ජිණ්ණෙච මාතාපිතරො භරස්සු.

1948. ලක්ඛී වත මෙ උදපාදි අජ්ජ
යො අද්දසාසිං පවරං දිජානං,
සුවස්ස සුත්වාන සුභාසිතානි
කාහාමි පුඤ්ඤානි අනප්පකානි.

1949. සො කොසියො අත්තමනො උදග්ගො
අන්නඤ්ච පානඤ්චභිසඞ්ඛරිත්වා,
අන්නෙන පානෙන පසන්නචිත්තො
සන්තප්පයි සමණෙ බ්රාහ්මණෙචාති.

1950. උපනීයතිදං මඤ්ඤෙ
චන්දෙ ලොහිතමදෙන මජ්ජාමි,
විජහාමි ජිවතං පාණා
මෙ චන්දෙ නිරුජ්ඣන්ති.

1951. ඔසධි මෙ දුක්ඛං මෙ
හදයං මෙ දය්හතෙ නිතම්මාමි,
තව චන්දියා සොචන්තියා
න නං අඤ්ඤෙහි සොකෙහි.