37. යෙ වද්ධමපචායන්ති නරා ධම්මස්ස කොවිදා,
දිට්ඨෙව ධම්මෙ පාසංසා සම්පරායෙ ච සුග්ගති’ති.
7. තිත්තිරජාතකං.
38. නාච්චන්තං නිකතිප්පඤ්ඤො නිකත්යා සුඛමෙධති,
ආරාධෙති නිකතිප්පඤ්ඤො ඛකො කක්කටකාමිවා’ති.
8. බකජාතකං.
39. මඤ්ඤෙ සොවණ්ණයො රාසි සොවණ්ණමාලා ච නන්දකො,
යත්ථ දාසො ආමජාතො ඨිතො ථුල්ලානි ගජ්ජතී’ති.
9. නන්දජාතකං.
40. කාමං පතාමි නිරයං උද්ධපාදො අවංසිරො,
නානරියං කරිස්සාමි හන්ද පිණ්ඩං පටිග්ගහා’ති.
10. ඛදිරඞ්ගාරජාතකං.
කුලාවකවග්ගො චතුත්ථො.
තස්සුද්දානං:
සිරිමාතලිධීතරපක්ඛිවරො
රතිරාගතොමාතාපිතා ච පුන,
ජගතීරුහවුද්ධසුකක්කටකො
තථා නන්දකපිණ්ඩවරෙන දස.
5. අත්ථකාමවග්ගො
41. යො අත්ථකාමස්ස හිතානුකම්පිනො
ඔවජ්ජමානො න කාරොති සාසනං.
අජියා පාදමොලුබ්භ
මිත්තකො විය සොචතීති.
1. ලොසකජාතකං.
42. යො අත්ථකාමස්ස හිතානුකම්පිනො
ඔවජ්ජමානො න කාරොති සාසනං,
කපොතකස්ස වචනං අකත්වා
අමිත්තහත්ථත්ථගතොව සෙතී’ති.
2. කපොතකජාතකං.
43. යො අත්ථකාමස්ස හිතානුකම්පිනො
ඔවජ්ජමානො න කාරොති සාසනං,
එවං සො නිහතො සෙති
වෙළුකස්ස යථා පිතා’ති.
3. වෙළුකජාතකං.
44. සෙය්යො අමිත්තො මතියා උපෙතො
නත්ථෙව මිත්තො මතිවිප්පහීනො,
මකසං වධිස්සන්ති හි එළමූගො
පුත්තො පිතු අබ්භිදා උත්තමඞ්ගන්ති.
4. මකසජාතකං.
45. සෙය්යො අමිත්තො මෙධාවී යඤ්චෙ බාලානුකම්පකො,
පස්ස රොහිණිකං ජම්මිං මාතරං හන්ත්වාන සොචති’ති.
5. රොහිණීජාතකං.
46. න වෙ අනත්ථකුසලෙන අත්ථචරියා සුඛාවහා,
හාපෙති අත්ථං දුම්මෙධො කපි ආරාමිකො යථා’ති.
6. ආරාමදූසකජාතකං.