33. සම්මොදමානා ගච්ඡන්ති ජාලමාදාය පක්ඛිනො,
යදා තෙ විවදිස්සන්ති තදා එහින්ති මෙ වස’න්ති.

34. න මං සීතං න මං උණ්හං න මං ජාලස්මිං බාධනං,
යඤ්ච මං මඤ්ඤතෙ මච්ඡි අඤ්ඤං සො රතියා ගතො’ති.

35. සන්ති පක්ඛා අපතනා සන්ති පාදා අවඤ්චනා,
මාතා පිතා ච නික්ඛන්තා ජාතවෙද පටික්කමා’ති.

36. යං නිස්සිතා ජගතිරුහං විහඞ්ගමා
ස්වායං අග්ගිං පමුඤ්චති,
දිසා භජථ වක්කඞ්ගා
ජාතං සරණතො භයන්ති.

37. යෙ වද්ධමපචායන්ති නරා ධම්මස්ස කොවිදා,
දිට්ඨෙව ධම්මෙ පාසංසා සම්පරායෙ ච සුග්ගති’ති.

38. නාච්චන්තං නිකතිප්පඤ්ඤො නිකත්යා සුඛමෙධති,
ආරාධෙති නිකතිප්පඤ්ඤො ඛකො කක්කටකාමිවා’ති.

39. මඤ්ඤෙ සොවණ්ණයො රාසි සොවණ්ණමාලා ච නන්දකො,
යත්ථ දාසො ආමජාතො ඨිතො ථුල්ලානි ගජ්ජතී’ති.

40. කාමං පතාමි නිරයං උද්ධපාදො අවංසිරො,
නානරියං කරිස්සාමි හන්ද පිණ්ඩං පටිග්ගහා’ති.

සිරිමාතලිධීතරපක්ඛිවරො
රතිරාගතොමාතාපිතා ච පුන,
ජගතීරුහවුද්ධසුකක්කටකො
තථා නන්දකපිණ්ඩවරෙන දස.