3. 5. 4.
[අග්ගිසුත්තං]
93. වුත්තං හෙතං භගවතා වුත්තමරහතා’ති මෙ සුතං:
1. තයො’මෙ භික්ඛවෙ අග්ගී. කතමෙ තයො? රාගග්ගි දොසග්ගි මොහග්ගි. ඉමෙ ඛො භික්ඛවෙ තයො අග්ගීති.
එතමත්ථං භගවා අවොච. තත්ථෙතං ඉති වුච්චති:
2. “රාගග්ගි දහති මච්චෙ රත්තෙ කාමෙසු මුච්ඡිතෙ,
දොසග්ගි පන බ්යාපන්නෙ නරෙ පාණාතිපාතිනො.
දොසග්ගි පන බ්යාපන්නෙ නරෙ පාණාතිපාතිනො.
3. මොහග්ගි පන සම්මූළ්හෙ අරියධම්මෙ අකොවිදෙ,
එතෙ අග්ගී අජානන්තී සක්කායාභිරතා පජා.
එතෙ අග්ගී අජානන්තී සක්කායාභිරතා පජා.
4. තෙ වඩ්ඪයන්ති නිරයං තිරච්ඡානඤ්ච යොනියො,
අසුරං පෙත්තිවිසයං අමුත්තා මාරබන්ධනා.
අසුරං පෙත්තිවිසයං අමුත්තා මාරබන්ධනා.
5. යෙ ච රත්තින්දිවා යුත්තා සම්මාසම්බුද්ධසාසනෙ,
තෙ නිබ්බාපෙන්ති රාගග්ගිං නිච්චං අසුභසඤ්ඤිනො.
තෙ නිබ්බාපෙන්ති රාගග්ගිං නිච්චං අසුභසඤ්ඤිනො.
6. දොසග්ගිං පන මෙත්තාය නිබ්බාපෙන්ති නරුත්තමා,
මොහග්ගිං පන පඤ්ඤාය යායං නිබ්බෙධගාමිනී.
මොහග්ගිං පන පඤ්ඤාය යායං නිබ්බෙධගාමිනී.
7. තෙ නිබ්බාපෙත්වා නිපකා රත්තින්දිවමතන්දිතා,
අසෙසං පරිනිබ්බන්ති අසෙසං දුක්ඛමච්චගුං.
අසෙසං පරිනිබ්බන්ති අසෙසං දුක්ඛමච්චගුං.
8. අරියද්දසා වෙදගුනො සම්මදඤ්ඤාය පණ්ඩිතා,
ජාතික්ඛයමභිඤ්ඤාය නාගච්ඡන්ති පුනබ්භවන්ති”.
ජාතික්ඛයමභිඤ්ඤාය නාගච්ඡන්ති පුනබ්භවන්ති”.
අයම්පි අත්ථො වුත්තො භගවතා. ඉති මෙ සුතන්ති.
3. 5. 5.
[උපපරික්ඛසුත්තං]
94. වුත්තං හෙතං භගවතා වුත්තමරහතා’ති මෙ සුතං:
1. තථා තථා භික්ඛවෙ භික්ඛු උපපරික්ඛෙය්ය යථා යථාස්ස උපපරික්ඛතො බහිද්ධා චස්ස විඤ්ඤාණං අවික්ඛිත්තං හොති අවිසටං, අජ්ඣත්තං අසණ්ඨිතං අනුපාදාය න පරිතස්සෙය්ය. බහිද්ධා චස්ස භික්ඛවෙ විඤ්ඤාණෙ අවික්ඛිත්තෙ අවිසටෙ සති අජ්ඣත්තං අසණ්ඨිතෙ අනුපාදාය අපරිතස්සතො ආයතිං ජාති ජරාමරණ දුක්ඛසමුදයසම්භවො න හොතී’ති.
එතමත්ථං භගවා අවොච. තත්ථෙතං ඉති වුච්චති:
2. “සත්තසඞ්ගපහීනස්ස නෙත්තිච්ඡින්නස්ස භික්ඛුනො,
වික්ඛීණො ජාතිසංසාරො නත්ථි තස්ස පුනබ්භවො”ති.
වික්ඛීණො ජාතිසංසාරො නත්ථි තස්ස පුනබ්භවො”ති.
අයම්පි අත්ථො වුත්තො භගවතා, ඉති මෙ සුතන්ති.
3. 5. 6.
[කාමූපපත්ති සුත්තං]
95. වුත්තං හෙතං භගවතා. වුත්තමරහතා’ති මෙ සුතං:
1. තිස්සො ඉමා භික්ඛවෙ කාමූපපත්තියො. කතමා තිස්සො? පච්චුපට්ඨිතකාමා, නිම්මානරතිනො, පරනිම්මිතවසවත්තිනො. ඉමා ඛො භික්ඛවෙ තිස්සො කාමූපපත්තියො”ති.