3. 5. 5.
[උපපරික්ඛසුත්තං]
94. වුත්තං හෙතං භගවතා වුත්තමරහතා’ති මෙ සුතං:
1. තථා තථා භික්ඛවෙ භික්ඛු උපපරික්ඛෙය්ය යථා යථාස්ස උපපරික්ඛතො බහිද්ධා චස්ස විඤ්ඤාණං අවික්ඛිත්තං හොති අවිසටං, අජ්ඣත්තං අසණ්ඨිතං අනුපාදාය න පරිතස්සෙය්ය. බහිද්ධා චස්ස භික්ඛවෙ විඤ්ඤාණෙ අවික්ඛිත්තෙ අවිසටෙ සති අජ්ඣත්තං අසණ්ඨිතෙ අනුපාදාය අපරිතස්සතො ආයතිං ජාති ජරාමරණ දුක්ඛසමුදයසම්භවො න හොතී’ති.
එතමත්ථං භගවා අවොච. තත්ථෙතං ඉති වුච්චති:
2. “සත්තසඞ්ගපහීනස්ස නෙත්තිච්ඡින්නස්ස භික්ඛුනො,
වික්ඛීණො ජාතිසංසාරො නත්ථි තස්ස පුනබ්භවො”ති.
අයම්පි අත්ථො වුත්තො භගවතා, ඉති මෙ සුතන්ති.
3. 5. 6.
[කාමූපපත්ති සුත්තං]
95. වුත්තං හෙතං භගවතා. වුත්තමරහතා’ති මෙ සුතං:
1. තිස්සො ඉමා භික්ඛවෙ කාමූපපත්තියො. කතමා තිස්සො? පච්චුපට්ඨිතකාමා, නිම්මානරතිනො, පරනිම්මිතවසවත්තිනො. ඉමා ඛො භික්ඛවෙ තිස්සො කාමූපපත්තියො”ති.
එතමත්ථං භගවා අවොච. තත්ථෙතං ඉති වුච්චති:
2. “පච්චුපට්ඨිතකාමා ච යෙ දෙවා වසවත්තිනො,
නිම්මානරතිනො දෙවා යෙ චඤ්ඤෙ කාමභොගිනො.
3. ඉත්ථභාවඤ්ඤථාභාවං සංසාරං නාතිවත්තරෙ,
එතමාදීනවං ඤත්වා කාමභොගෙසු පණ්ඩිතො,
සබ්බෙ පරිච්චජෙ කාමෙ යෙ දිබ්බා යෙ ච මානුසා.
4. පියරූපසාතගධිතං ඡෙත්වා සොතං දුරච්චයං,
අසෙසං පරිනිබ්බන්ති අසෙසං දුක්ඛමච්චගුං.
5. අරියද්දසා වෙදගුනො සම්මදඤ්ඤාය පණ්ඩිතා,
ජාතික්ඛයමභිඤ්ඤාය නාගච්ඡන්ති පුනබ්භව”න්ති.
අයම්පි අත්ථො වුත්තො භගවතා. ඉති මෙ සුතන්ති.
3. 5. 7.
[කාමයොගසුත්තං]
96. වුත්තං හෙතං භගවතා වුත්තමරහතා’ති මෙ සුතං:
1. කාමයොගයුත්තො භික්ඛවෙ භවයොගයුත්තො ආගාමී හොති ආගන්තා ඉත්ථත්තං.
කාමයොගවිසඤ්ඤුත්තො භික්ඛවෙ භවයොගයුත්තො අනාගාමී හොති අනාගන්තා ඉත්ථත්තං.
කාමයොගවිසඤ්ඤුත්තො භික්ඛවෙ භවයොගවිසඤ්ඤුත්තො අරහං හොති ඛීණාසවො’ති.
එතමත්ථං භගවා අවොච. තත්ථෙතං ඉති වුච්චති:
2. “කාමයොගෙන සංයුත්තා භවයොගෙන චූභයං,
සත්තා ගච්ඡන්ති සංසාරං ජාතිමරණගාමිනො.
3. යෙ ච කාමෙ පහත්වාන අප්පත්තා ආසවක්ඛයං,
භවයොගෙන සංයුත්තා ‘අනාගාමී’ති වුච්චරෙ.
4. යෙ ච ඛො ඡින්නසංසයා ඛීණමානපුනබ්භවා,
තෙ වෙ පාරං ගතා ලොකෙ යෙ පත්තා ආසවක්ඛය”න්ති.
අයම්පි අත්ථො වුත්තො භගවතා. ඉති මෙ සුතන්ති.
තතියභාණවාරං.