2. 1. 7.
[අනාතාපී සුත්තං]
34. වුත්තං හෙතං භගවතා. වුත්තමරහතා’ති මෙ සුතං.
1. අනාතාපී භික්ඛවෙ භික්ඛු අනොත්තාපී අභබ්බො සම්බොධාය, අභබ්බො නිබ්බානාය, අභබ්බො අනුත්තරස්ස යොගක්ඛෙමස්ස අධිගමාය. ආතාපී ච ඛො භික්ඛවෙ භික්ඛු ඔත්තාපී භබ්බො සම්බොධාය, භබ්බො නිබ්බානාය, භබ්බො අනුත්තරස්ස යොගක්ඛෙමස්ස අධිගමායා’ති.
එතමත්ථං භගවා අවොච. තත්ථෙතං ඉති වුච්චති:
2. “අනාතාපී අනොත්තාපී කුසීතො හීනවීරියො
යො ථීනමිද්ධබහුලො අහිරීකො අනාදරො
අභබ්බො තාදිසො භික්ඛු ඵුට්ඨුං සම්බොධිමුත්තමං.
3. යො ච සතිමා නිපකො ඣායී ආතාපී ඔත්තාපී ච අප්පමත්තො
සංයොජනං ජාතිජරාය ඡෙත්වා ඉධෙව සම්බොධිමනුත්තරං ඵුසෙ.
අයම්පි අත්ථො වුත්තො භගවතා, ඉති මෙ සුතන්ති.
2. 1. 8.
[පඨම ජනකුහන සුත්තං]
35. වුත්තං හෙතං භගවතා. වුත්තමරහතා’ති මෙ සුතං.
1. නයිදං භික්ඛවෙ බ්රහ්මචරියං වුස්සති ජනකුහනත්ථං ජනලපනත්ථං න ලාභසක්කාරසිලොකානිසංසත්ථං ‘ඉති මං ජනො ජානාතූ’ති. අථ ඛො ඉදං භික්ඛවෙ, බ්රහ්මචරියං වුස්සති සංවරත්ථඤ්ච පහානත්ථඤ්චාති.
එතමත්ථං භගවා අවොච. තත්ථෙතං ඉති වුච්චති:
2. “සංවරත්ථං පහානත්ථං බ්රහ්මචරියං අනීතිහං
අදෙසයි සො භගවා නිබ්බාණොගධගාමිනං.
3. එස මග්ගො මහත්තෙහි අනුයාතො මහෙසිභි.
යෙ යෙ තං පටිපජ්ජන්ති යථා බුද්ධෙන දෙසිතං
දුක්ඛස්සන්තං කරිස්සන්ති සත්ථුසාසනකාරිනො”ති.
අයම්පි අත්ථො වුත්තො භගවතා. ඉති මෙ සුතන්ති.
2. 1. 9.
[දුතිය ජනකුහන සුත්තං]
36. වුත්තං හෙතං භගවතා. වුත්තමරහතා’ති මෙ සුතං.
1. නයිදං භික්ඛවෙ බ්රහ්මචරියං වුස්සති ජනකුහනත්ථං ජනලපනත්ථං ලාභසක්කාරසිලොකානිසංසත්ථං ‘ඉති මං ජනො ජානාතූ’ති. අථ ඛො ඉදං භික්ඛවෙ, බ්රහ්මචරියං වුස්සති අභිඤ්ඤත්ථඤ්චෙව පරිඤ්ඤත්ථඤ්චාති.
එතමත්ථං භගවා අවොච. තත්ථෙතං ඉති වුච්චති:
2. “අභිඤ්ඤත්ථං පරිඤ්ඤත්ථං බ්රහ්මචරියං අනීතිහං
අදෙසයි සො භගවා නිබ්බානොගධගාමිනං.
3. එස මග්ගො මහත්තෙහි අනුයාතො මහෙසිභි
යෙ යෙ තං පටිපජ්ජන්ති යථා බුද්ධෙන දෙසිතං
දුක්ඛස්සන්තං කරිස්සන්ති සත්ථුසාසනකාරිනො”ති.
අයම්පි අත්ථො වුත්තො භගවතා, ඉති මෙ සුතන්ති.