පඨමො වග්ගො
2. 1. 1.
[පඨමභික්ඛුසුත්තං]
28. වුත්තං හෙතං භගවතා වුත්තමරහතා’ති මෙ සුතං:
1. ද්වීහි භික්ඛවෙ ධම්මෙහි සමන්නාගතො භික්ඛු දිට්ඨෙව ධම්මෙ දුක්ඛං විහරති සවිඝාතං සඋපායාසං සපරිළාහං. කායස්ස භෙදා පරම්මරණා දුග්ගති පාටිකඞ්ඛා. කතමෙහි ද්වීහි? ඉන්ද්රියෙසු අගුත්තද්වාරතාය ච භොජනෙ අමත්තඤ්ඤුතාය ච. ඉමෙහි ඛො භික්ඛවෙ ද්වීහි ධම්මෙහි සමන්නාගතො භික්ඛු දිට්ඨෙව ධම්මෙ දුක්ඛං විහරති සවිඝාතං සඋපායාසං සපරිළාහං. කායස්ස භෙදා පරම්මරණා දුග්ගති පාටිකඞ්ඛා”ති.
එතමත්ථං භගවා අවොච. තත්ථෙතං ඉති වුච්චති:
2. චක්ඛු සොතඤ්ච ඝානඤ්ච ජිව්හා කායො අථො මනො
එතානි යස්ස ද්වාරානි අගුත්තානීධ භික්ඛුනො
3. භොජනම්හි අමත්තඤ්ඤූ ඉන්ද්රියෙසු අසංවුතො
කායදුක්ඛං චෙතොදුක්ඛං දුක්ඛං සො අධිගච්ඡති
4. ඩය්හමානෙන කායෙන ඩය්හමානෙන චෙතසා
දිවා වා යදි වා රත්තිං දුක්ඛං විහරති තාදිසො’ති.
අයම්පි අත්ථො වුත්තො භගවතා. ඉති මෙ සුතන්ති.
2. 1. 2.
[දුතියභික්ඛු සුත්තං]
29. වුත්තං හෙතං භගවතා. වුත්තමරහතා’ති මෙ සුතං:
1. ද්වීහි භික්ඛවෙ ධම්මෙහි සමන්නාගතො භික්ඛු දිට්ඨෙව ධම්මෙ සුඛං විහරති අවිඝාතං අනුපායාසං අපරිළාහං. කායස්ස භෙදා පරම්මරණා සුගති පාටිකඞ්ඛා. කතමෙහි ද්වීහි? ඉන්ද්රියෙසු ගුත්තද්වාරතාය ච භොජනෙ මත්තඤ්ඤුතාය ච. ඉමෙහි ඛො භික්ඛවෙ ද්වීහි ධම්මෙහි සමන්නාගතො භික්ඛු දිට්ඨෙව ධම්මෙ සුඛං විහරති අවිඝාතං අනුපායාසං අපරිළාහං. කායස්ස භෙදා පරම්මරණා සුගති පාටිකඞ්ඛා ති.
එතමත්ථං භගවා අවොච. තත්ථෙතං ඉති වුච්චති:
2. චක්ඛු සොතඤ්ච ඝානඤ්ච ජිව්හා කායො අථො මනො.
එතානි යස්ස ද්වාරානි සුගුත්තානීධ භික්ඛුනො.
3. භොජනම්හි ච මත්තඤ්ඤූ ඉන්ද්රියෙසු ච සංවුතො
කායසුඛං චෙතොසුඛං සුඛං සො අධිගච්ඡති.
4. අඩය්හමානෙන කායෙන අඩය්හමානෙන චෙතසා
දිවා වා යදි වා රත්තිං සුඛං විහරති තාදිසො’ති.
අයම්පි අත්ථො වුත්තො භගවතා. ඉති මෙ සුතන්ති.
2. 1. 3.
[තපනීය සුත්තං]
30. වුත්තං හෙතං භගවතා වුත්තමරහතා’ති මෙ සුතං.
1. ද්වෙ මෙ භික්ඛවෙ තපනීයා. කතමෙ ද්වෙ? ඉධ භික්ඛවෙ එකච්චො අකතකල්යාණො හොති අකතකුසලො අකතභීරුත්තානො, කතපාපො කතලුද්දො කතකිබ්බිසො. සො අකතං මෙ කල්යාණන්ති’පි තප්පති. කතං මෙ පාපන්ති’පි තප්පති. ඉමෙ ඛො භික්ඛවෙ ද්වෙ ධම්මා තපනීයා’ති.
එතමත්ථං භගවා අවොච. තත්ථෙතං ඉති වුච්චති:
2. කායදුච්චරිතං කත්වා වචීදුච්චරිතානි ච
මනොදුච්චරිතං කත්වා යඤ්චඤ්ඤං දොසසඤ්හිතං.
3. අකත්වා කුසලං කම්මං කත්වානාකුසලං බහුං
කායස්ස භෙදා දුප්පඤ්ඤො නිරයං සො උපපජ්ජතීති.
අයම්පි අත්ථො වුත්තො භගවතා. ඉති මෙ සුතන්ති.