239. යදා අහං අමිතයසො රාජපුත්තො යුධඤ්ජයො
උස්සාවබින්දුං සුරියාතපෙ පතිතං දිස්වාන සංවිජිං.

240. තඤ්ඤෙවාධිපතිං කත්වා සංවෙගමනුබ්රූහයිං
මාතාපිතු ච වන්දිත්වා පබ්බජ්ජමනුයාචහං.

241. යාචන්තිමං පඤ්ජලිකා සනෙගමා සරට්ඨකා
අජ්ජෙව පුත්ත පටිපජ්ජ ඉද්ධං ඵීතං මහාමහිං.

242. සරාජකෙ සහොරොධෙ සනෙගමෙ සරට්ඨකෙ
කරුණං පරිදෙවන්තෙ අනෙපෙක්ඛො හි පබ්බජිං.

243. කෙවලං පඨවිං රජ්ජං ඤාති පරිජන යසං
චජමානො න චින්තෙසිං බොධියායෙව කාරණා.

244. මාතා පිතා න මෙ දෙස්සා නපි දෙස්සං මහායසං
සබ්බඤ්ඤුතං පියං මය්හං තස්මා රජ්ජං පරිච්චජින්ති.

245. පුනාපරං යදා හොමි ඉන්දපත්තෙ පුරුත්තමෙ
කාමිතො දයිතො පුත්තො සොමනස්සොති විස්සුතො.

246. සීලවා ගුණ සම්පන්නො කල්යාණපටිභාණවා
වුද්ධාපචායී හිරිමා සඞ්ගහෙසු ච කොවිදො.

247. තස්ස රඤ්ඤො පතිකරො අහොසි කුහකතාපසො
ආරාමං මාලාවච්ඡඤ්ච රොපයිත්වාන ජීවති

248. තමහං දිස්වාන කුහකං ථුසරාසිංව අතණ්ඩුලං
දුමං අන්තො ව සුසිරං කදලිංව අසාරකං.

249. නත්ථි’මස්ස සතං ධම්මො සාමඤ්ඤාපගතො අයං
හිරි සුක්කධම්මජහිතො ජීවිතවුත්තිකාරණා.

250. කුපිතො අහොසි පච්චන්තො අටවීහි පරන්තිහි
තං නිසෙධෙතුං ගච්ඡන්තො අනුසාසි පිතා මමං.

251. මා පමජ්ජි තුවං තාත ජටිලං උග්ගතාපනං
යදිච්ඡකං පවත්තෙහි සබ්බකාමදදො හි සො.

252. තමහං ගන්ත්වානු’ පට්ඨානං ඉදං වචනමබ්රවිං
කච්චිතෙ ගහපති කුසලං කිං වා තෙ ආහරීයතු.

253. තෙන සො කුපිතො ආසි කුහකො මානනිස්සිතො
ඝාතාපෙමි තුවං අජ්ජ රට්ඨා පබ්බාජයාමි වා.

254. නිසෙධයිත්වා පච්චන්තං රාජා කුහකමබ්රවි
කච්චි තෙ භන්තෙ ඛමනීයං සම්මානො තෙ පවත්තිතො
තස්ස ආචික්ඛති පාපො කුමාරො යථා නාසියො.

255. තස්ස තං වචනං සුත්වා ආණාපෙසි මහීපති
සීසං තත්ථෙව ඡින්දිත්වා කත්වාන චතුඛණ්ඩිකං
රථියා රථියං දස්සෙථ සා ගතී ජටිලහීළිතො.

256. තත්ථ කාරණිකා ගන්ත්වා චණ්ඩා ලුද්දා අකාරුණා
මාතු අඞ්කෙ නිසින්නස්ස ආකඩ්ඪිත්වා නයන්ති මං.

257. තෙසාහං එවමවචං බන්ධතං ගාළ්හබන්ධනං
“රඤ්ඤො දස්සෙථ මං ඛිප්පං රාජකිරියානි අත්ථිමෙ”.