1. කප්පෙ ච සතසහස්සෙ චතුරො ච අසඞ්ඛියෙ
එත්ථන්තරෙ යං චරිතං සබ්බං තං බොධිපාචනං.

2. අතීතකප්පෙ චරිතං ඨපයිත්වා භවාභවෙ
ඉමම්හි කප්පෙ චරිතං පවක්ඛිස්සං සුණොහි මෙ.

3. යදා අහං බ්රහාරඤ්ඤෙ සුඤ්ඤෙ විපින කානනෙ
අජ්ඣොගහෙත්වා විහාරාමි අකිත්ති නාම තාපසො.

4. තදා මං තපතෙජෙන සන්තත්තො තිදිවාධිභූ
ධාරෙන්තො බ්රාහ්මණවණ්ණං භික්ඛාය මංඋපාගමි.

5. පවනා ආභතං පණ්ණං අතෙලඤ්ච අලොණිකං
මම ද්වාරෙ ඨිතං දිස්වා සකටාහෙන ආකිරිං.

6. තස්ස දත්වානහං පණ්ණං නික්කුජ්ජිත්වාන භාජනං
පුනෙසනං ජහිත්වාන පාවිසිං පණ්ණසාලකං.

7. දුතියම්පි තතියම්පි උපගඤ්ඡි මමන්තිකං
අකම්පිතො අනොලග්ගො එවමෙවමදාසහං.

8. න මෙ තප්පච්චයා අත්ථි සරීරස්මිං විවණ්ණියං
පීතිසුඛෙන රතියා වීතිනාමෙමි තං දිවං.

9. යදි මාසම්පි ද්වෙ මාසං දක්ඛිණෙය්යං වරං ලභෙ
අකම්පිතො අනොලීනො දදෙය්යං දානමුත්තමං.

10. න තස්ස දානං දදමානො යසං ලාභඤ්ච පත්ථයිං
සබ්බඤ්ඤුතං පත්ථයානො තානි කම්මානි ආචරින්ති.

11. පුනාපරං යදා හොමි බ්රාහ්මණො සඞ්ඛසව්හයො
මහාසමුද්දං තරිතුකාමො උපගච්ඡාමි පට්ටනං

12. තත්ථද්දසාමි පටිපථෙ සයම්භුං අපරාජිතං
කන්තාරද්ධාන පටිපන්නං තත්තාය කඨිනභූමීයා.

13. තමහං පටිපථෙ දිස්වා ඉමමත්ථං විචින්තයිං
ඉදං ඛෙත්තං අනුප්පත්තං පුඤ්ඤකාමස්ස ජන්තුනො.

14. යථාපි කස්සකො පුරිසො ඛෙත්තං දිස්වා මහාගමං.
තත්ථ බීජං න රොපෙති න සො ධඤ්ඤෙන අත්ථිකො.

15. එවමෙවාහං පුඤ්ඤකාමො දිස්වා ඛෙත්ත වරුත්තමං
යදි තත්ථ කාරං න කරොමි නාහං පුඤ්ඤෙන අත්ථිකො.

16. යථා අමච්චො මුද්දිකාමො රඤ්ඤො අන්තෙ පුරෙ ජනෙ
න දෙති තෙසං ධනධඤ්ඤං මුද්දිතො පරිහායති.

17. එවමෙවාහං පුඤ්ඤකාමො විපුලං දිස්වාන දක්ඛිණං
යදි තස්ස දානං න දදාමි පරිහායිස්සාමි පුඤ්ඤතො

18. එවාහං චින්තයිත්වාන ඔරොහිත්වා උපාහනා
තස්ස පාදානි වන්දිත්වා අදාසිං ඡත්තුපාහනං

19. තෙනෙවාහං සතගුණතො සුඛුමාලො සුඛෙධිතො
අපිච දානං පරිපූරෙන්තො එවං තස්ස අදාසහන්ති.