221. පඤ්චාලරට්ඨෙ නගරවරෙ කම්පිල්ලායං පුරුත්තමෙ
රාජා ජයද්දිසො නාම සීලගුණමුපාගතො.

222. තස්ස රඤ්ඤො අහං පුත්තො සුතධම්මො සුසීලවා
අලීනසත්තො ගුණවා අනුරත්තපරිජනො සදා.

223. පිතා මෙ මිගවං ගන්ත්වා පොරිසාදං උපාගමි
සො මෙ පිතුමග්ගහෙසි භක්ඛොසි මම මා චලි.

224. තස්ස තං වචනං සුත්වා භීතො තසිතවෙධිතො
ඌරුක්ඛම්භො අහූ තස්ස දිස්වාන පොරිසාදකං.

225. මිගවං ගහෙත්වා මුඤ්චස්සු කත්වා ආගමනං පුන
බ්රාහ්මණස්ස ධනං දත්වා පිතා ආමන්තයී මමං.

226. රජ්ජං පුත්ත, පටිපජ්ජ මා පමජ්ජී පුරං ඉදං
කතං මෙ පොරිසාදෙන මම ආගමනං පුන.

227. මාතු පිතු ච වන්දිත්වා නිස්සජිත්වාන අත්තානං
නික්ඛිපිත්වා ධනුං ඛග්ගං පොරිසාද මුපාගමිං.

228. සසත්ථහත්ථූපගතං කදාචි සො තසිස්සතී
තෙන භිජ්ජිස්සතී සීලං පරිත්තාසං කතෙ මයි.

229. සීල ඛණ්ඩභයා, මය්හං තස්ස දෙස්සං න බ්යාහරීං
මෙත්තචිත්තො හිතවාදී ඉදං වචනමබ්රවිං.

230. උජ්ජාලෙහි මහාඅග්ගිං පපතිස්සාමි රුක්ඛතො
සම්පක්ක කාලමඤ්ඤාය භක්ඛය ත්වං පිතාමහ,

231. ඉති සීලවතං හෙතු නාරක්ඛිං මම ජීවිතං
පබ්බාජෙසිං චහං තස්ස සදා පාණාතිපාතිකන්ති.

232. පුනාපරං යදා හොමි සඞ්ඛපාලො මහිද්ධිකො
දාඨාවුධො ඝොරවිසො ද්විජිව්හො උරගාධිභූ.

233. චතුප්පථෙ මහාමග්ගෙ නානා ජනසමාකුලෙ
චතුරො අඞ්ගෙ අධිට්ඨාය තත්ථ වාසමකප්පයිං.

234. ඡවියා චම්මෙන මංසෙන නහාරු අට්ඨිකෙහි වා
යස්ස එතෙන කරණීයං දින්නං යෙව හරාතු සො.

235. අද්දසංසු භොජපුත්තා ඛරා ලුද්දා අකාරුණා
උපගඤ්ඡුං මමං තත්ථ දණ්ඩමුග්ගරපාණිනො.

236. නාසාය විනිවිජ්ඣිත්වා නඞ්ගුට්ඨෙ පිට්ඨිකණ්ටකෙ
කාජෙ ආරොපයිත්වාන භොජපුත්තා හරිංසු මං.