51. අරිට්ඨසව්හයෙ නගරෙ සිවි නාමාසිං ඛත්තියො
නිසජ්ජ පාසාදවරෙ එවං චින්තෙසහං තදා.

52. යං කිඤ්චි මානුසං දානං අදින්නං මෙ න විජ්ජති
යොපි වාචෙය්ය මං චක්ඛුං දදෙය්යං අවිකම්පිතො.

53. මම සඞ්කප්පමඤ්ඤාය සක්කො දෙවානමිස්සරො
නිසින්නො දෙවපරිසාය ඉදං වචනමබ්රුවි.

54. නිසජ්ජපාසාදවරෙ සිවිරාජා මහිද්ධිකො
චින්තෙන්තො විවිධං දානං අදෙය්යං සො න පස්සති,

55. තථන්නු විතථන්තෙතං හන්ද වීමංසයාමි තං
මුහුත්තං ආගමෙය්යාථ යාව ජානාමි තං මනං.

56. පවෙධමානො පලිතසිරො වලිතගත්තො ජරාතුරො
අන්ධවණ්ණොව හුත්වාන රාජානං උපසඞ්කමි.

57. සො තදා පග්ගහෙත්වාන වාමං දක්ඛිණබාහු ච
සිරස්මිං අඤ්ජලිං කත්වා ඉදං වචනමබ්රුවි.

58. යාචාමි තං මහාරාජ ධම්මිකරට්ඨවඩ්ඪන
තව දානරතා කිත්ති උග්ගතා දෙවමානුසෙ.

59. උභොපි නෙත්තා නයනා අන්ධා උපහතා මම
එකං මෙ නයනං දෙහි ත්වම්පි එකෙන යාපය.

60. තස්සාහං වචනං සුත්වා හට්ඨො සංවිග්ගමානසො
කතඤ්ජලී වෙදජාතො ඉදං වචනමබ්රූවිං.

61. ඉදානාහං චින්තයිත්වා පාසාදතො ඉධාගතො
ත්වං මම චිත්තමඤ්ඤාය නෙත්තං යාචිතුමාගතො.

62. අහො මෙ මානසං සිද්ධං සඞ්කප්පො පරිපූරිතො
අදින්නපුබ්බං දානවරං අජ්ජ දස්සාමි යාචකෙ.

63. එහි සීවක උට්ඨෙහි මා දන්ධයි මා පවෙධයි
උභොපි නයනෙ දෙහි උප්පාටෙත්වා වණිබ්බකෙ.

64. තතො සො චොදිතො මය්හං සීවකො වචනඞ්කරො
උද්ධරිත්වාන පාදාසි තාලමිඤ්ජංව යාචකෙ.

65. දදමානස්ස දෙන්තස්ස දින්නදානස්ස මෙ සතො
චිත්තස්ස අඤ්ඤථා නත්ථි බොධියා යෙව කාරණා.

66. න මෙ දෙස්සා උභො චක්ඛු අත්තා න මෙ න දෙස්සියො
සබ්බඤ්ඤුතං පියං මය්හං තස්මා චක්ඛුං අදාසහන්ති.

67. යා මෙ අහොසි ජනිකා ඵුසතී නාම ඛත්තියා
සා අතීතාසු ජාතිසු සක්කස්ස මහෙසි පියා.

68. තස්සා ආයුක්ඛයං දිස්වා දෙවින්දො එතදබ්රුවි
දදාමි තෙ දසවරෙ වර භද්දෙ යදිච්ඡසි.

69. එවං වුත්තා ච සා දෙවී සක්කං පුනිද මබ්රුවි
කින්නු මෙ අපරාධත්ථි කින්නු දෙස්සා අහං තව
රම්මා චාවෙසි මං ඨානා වාතොව ධරණීරුහං.

70. එවං වුත්තො ච සො සක්කො පුන තස්සීදමබ්රුවි
න චෙව තෙ කතං පාපං න ච මෙ ත්වමසි අප්පියා.