1. සොභිතස්ස අපරෙන සම්බුද්ධො දිපදුත්තමො
අනොමදස්සී අමිතයසො තෙජස්සී දුරතික්කමො.

2. සො ඡෙත්වා බන්ධනං සබ්බං විද්ධංසෙත්වා තයො භවෙ
අනිවත්ති ගමනං මග්ගං දෙසෙසි දෙවමානුසෙ.

3. සාගරො’ව අසඞ්ඛොභො පබ්බතො’ව දුරාසදො
ආකාසො’ව අනන්තො සො සාලරාජාව ඵුල්ලිතො.

4. දස්සනෙන’පි තං බුද්ධං තොසිතා හොන්ති පාණිනො
ව්යාහරන්තං ගිරං සුත්වා අමතං පාපුණන්ති තෙ.

5. ධම්මාභිසමයො තස්ස ඉද්ධො ඵීතො තදා අහු
කොටිසතානි අභිසමිංසු පඨමෙ ධම්මදෙසනෙ.

6. තතො පරම්හි සමයෙ වස්සන්තෙ ධම්මවුට්ඨියො
අසීතිකොටියො අභිසමිංසු දුතියෙ ධම්මදෙසනෙ.

7. තතො පරම්පි වස්සන්තෙ තප්පයන්තෙ ච පාණිනං
අට්ඨසත්තතිකොටීනං තතියා’භිසමයො අහු.

8. සන්නිපාතා තයො ආසුං තස්සාපි ච මහෙසිනො
අභිඤ්ඤා බලප්පත්තානං පුප්ඵිතානං විමුත්තියා.

9. අට්ඨසතසහස්සානං සන්නිපාතො තදා අහු
පහීනමදමොහානං සන්තචිත්තාන තාදිනං.

10. සත්තසතසහස්සානං දුතියො ආසි සමාගමො
අනඞ්ගණානං විරජානං උපසන්තාන තාදිනං.

11. ඡන්නං සතසහස්සානං තතියො ආසි සමාගමො
අභිඤ්ඤාබලප්පත්තානං නිබ්බුතානං තපස්සිනං.

12. අහං තෙන සමයෙන යක්ඛො ආසිං මහිද්ධිකො
නෙකානං යක්ඛකොටීනං වසවතතීමහිස්සරො.

13. තදා’පි තං බුද්ධවරං උපගන්ත්වා මහෙසිනං
අන්නපානෙන තප්පෙසිං සසඞ්ඝං ලොකනායකං.

14. සො’පි මං තදා ව්යාකාසි විසුද්ධනයනො මුනි
අපරිමෙය්යෙ ඉතො කප්පෙ අයං බුද්ධො භවිස්සති.

15. අහු කපිලව්හයා රම්මා නික්ඛමිත්වා තථාගතො
පධානං පදහිත්වාන කත්වා දුක්කරකාරිකං.

16. අජපාලරුක්ඛමූලස්මිං නිසීදිත්වා තථාගතො
තත්ථ පායාසමග්ගය්හ නෙරඤ්ජරමුපෙහිති.

17. නෙරඤ්ජරාය තීරම්හි පායාසං ආදාය සො ජිනො
පටියත්තවරමග්ගෙන බොධිමූලම්හි එහිති.

18. තතො පදක්ඛිණං කත්වා බොධිමණ්ඩං අනුත්තරො
අස්සත්ථරුක්ඛමූලම්හි බුජ්ඣිස්සති මහායසො.

19. ඉමස්ස ජනිකා මාතා මායා නාම භවිස්සති
පිතා සුද්ධොදනො නාම අයං හෙස්සති ගොතමො.

20. කොලිතො උපතිස්සො ච අග්ගා හෙස්සන්ති සාවකා
ආනන්දො නාමු’පට්ඨාකො උපට්ඨිස්සති තං ජිනං.

21. ඛෙමා උප්පලවණ්ණා ච අග්ගා හෙස්සන්ති සාවිකා
බොධි තස්ස භගවතො අස්සත්ථො’ති පවුච්චති.