1. මඞ්ගලස්ස අපරෙන සුමනො නාම නායකො
සබ්බධම්මෙහි අසමො සබ්බසත්තාන’ මුත්තමො.

2. සො’පි තදා අමතභෙරිං අහනී මෙඛලෙ පුරෙ,
ධම්මසඞ්ඛසමායුත්තං නවඞ්ගං ජිනසාසනං.

3. නිජ්ජිනිත්වා කිලෙසෙ සො පත්වා සම්බොධි’මුත්තමං
මාපෙසි නගරං සත්ථා සද්ධම්මපුරවරුත්තමං.

4. නිරන්තරං අකුටිලං උජුං විපුල විත්ථතං
මාපෙසි සො මහාවීථිං සතිපට්ඨානවරුත්තමං.

5. ඵලෙ චත්තාරි සාමඤ්ඤෙ චතස්සො පටිසම්භිදා
ඡළභිඤ්ඤාට්ඨ සමාපත්ති පසාරෙසි තත්ථ වීථියං.

6. යෙ අප්පමත්තා අඛිලා හිරි විරියෙහු’පාගතා
තෙ තෙ ඉමෙ ගුණවරෙ ආදියන්ති යථා සුඛං.

7. එවමෙතෙන යොගෙන උද්ධරන්තො මහාජනං
බොධෙසි පඨමං සත්ථා කොටිසතසහස්සියො.

8. යම්හි කාලෙ මහාවීරො ඔවදි තිත්ථියෙ ගණෙ
කොටි සහස්සාභිසමිංසු දුතියෙ ධම්මදෙසනෙ.

9. යදා දෙවා මනුස්සා ච සමග්ගා එකමානසා
නිරොධ පඤ්හං පුච්ඡිංසු සංසයඤ්චා’පි මානසං.

10. තදා’පි ධම්මදෙසනෙ නිරොධ පරිදීපනෙ
නවුති කොටි සහස්සානං තතියා’භිසමයො අහු.

11. සන්නිපාතා තයො ආසුං සුමනස්ස මහෙසිනො
ඛීණාසවානං විමලානං සන්ත චිත්තාන තාදිනං.

12. වස්සං වුත්ථස්ස භගවතො අභිඝුට්ඨෙ පවාරණෙ
කොටිසතසහස්සෙහි පවාරෙසි තථාගතො.

13. තතො පරං සන්නිපාතෙ විමලෙ කඤ්චන පබ්බතෙ
නවුතිකොටිසහස්සානං දුතියො ආසි සමාගමො.

14. යදා සක්කො දෙවරාජා බුද්ධදස්සනු’පාගමි
අසීතිකොටිසහස්සානං තතියො ආසි සමාගමො.

15. අහං තෙන සමයෙන නාගරාජා මහිද්ධිකො
අතුලො නාම නාමෙන උස්සන්නකුසලසඤ්චයො.

16. තදා’හං නාගභවනා නික්ඛමිත්වා ස ඤාතිහි
නාගානං දිබ්බතුරියෙහි සසඞ්ඝං ජිනමුපට්ඨහිං.

17. කොටි සත සහස්සානං අන්නපානෙන තප්පයිං
පච්චෙකං දුස්සයුගං දත්වා සරණං තං උපාගමිං.

18. සොපි මං බුද්ධො ව්යාකාසි සුමනො ලොක නායකො
අපරිමෙය්යෙ ඉතො කප්පෙ අයං බුද්ධො භවිස්සති.

19. අහු කපිලව්හයා රම්මා නික්ඛමිත්වා තථාගතො
පධානං පදහිත්වාන කත්වා දුක්කරකාරිකං.

20. අජපාලරුක්ඛමූලස්මිං නිසීදිත්වා තථාගතො
තත්ථ පායාසමග්ගය්හ නෙරඤ්ජර මුපෙහිති.

21. නෙරඤ්ජරාය තීරම්හි පායාසං ආදාය සො ජිනො
පටියත්තවරමග්ගෙන බොධිමූලම්හි එහිති.

22. තතො පදක්ඛිණං කත්වා බොධිමණ්ඩං අනුත්තරො
අස්සත්ථ රුක්ඛමූලම්හි බුජ්ඣිස්සති මහායසො.