1. සුමනස්ස අපරෙන රෙවතො නාම නායකො
අනුපමො අසදිසො අතුලො උත්තමො ජිනො.

2. සො’පි ධම්මං පකාසෙසි බ්රහ්මුනා අභියාචිතො
ඛන්ධධාතුවවත්ථානං අප්පවත්තං භවා’භවෙ.

3. තස්සා’භිසමයා තීණි අහෙසුං ධම්මදෙසනෙ
ගණනාය න වත්තබ්බො පඨමා’භිසමයො අහු.

4. යදා අරින්දමං රාජං විනෙසි රෙවතො මුනි
තදා කොටිසහස්සානං දුතියා’භිසමයො අහු.

5. සත්තා’හං පටිසල්ලානා වුට්ඨහිත්වා නරාසභො
කොටිසතං නරමරූනං විනෙසි උත්තමෙ ඵලෙ.

6. සන්නිපාතා තයො ආසුං රෙවතස්ස මහෙසිනො
ඛීණාසවානං විමලානං සුවිමුත්තාන’ තාදිනං.

7. අතික්කන්තා ගණනපථං පඨමං යෙ සමාගතා
කොටිසතසහස්සානාං දුතියො ආසි සමාගමො.

8. යො’පි පඤ්ඤාය අසමො තස්ස චක්කානුවත්තකො
සො තදා ව්යාධිතො ආසි පත්තො ජීවිතසංසයං.

9. තස්ස ගිලානපුච්ඡාය යෙ තදා උපගතා මුනි
කොටිසතසහස්සා අරහන්තො තතියො ආසි සමාගමො.

10. අහං තෙන සමයෙන අතිදෙවො නාම බ්රාහ්මණො
උපගන්ත්වා රෙවතං බුද්ධං සරණං තස්ස ගච්ඡහං.

11. තස්ස සීලං සමාධිඤ්ච පඤ්ඤාගුණමනුත්තමං
ථොමයිත්වා යථාථාමං උත්තරීය’මදාස’හං.

12. සො’පි මං බුද්ධො ව්යාකාසි රෙවතො ලොකනායකො
අපරිමෙය්යෙ ඉතො කප්පෙ අයං බුද්ධො භවිස්සති.

13. අහු කපිලව්හයා රම්මා නික්ඛමිත්වා තථාගතො
පධානං පදහිත්වාන කත්වා දුක්කරකාරිකං.

14. අජපාලරුක්ඛමූලස්මිං නිසීදිත්වා තථාගතො
තත්ථ පායාසමග්ගය්හ නෙරඤ්ජරමුපෙහිති.

15. නෙරඤ්ජරාය තීරම්හි පායාසං ආදාය සො ජිනො
පටියත්තවරමග්ගෙන බොධිමූලම්හි එහිති.

16. තතො පදක්ඛිණං කත්වා බොධිමණ්ඩං අනුත්තරො
අස්සත්ථරුක්ඛමූලම්හි බුජ්ඣිස්සති මහායසො.

17. ඉමස්ස ජනිකා මාතා මායා නාම භවිස්සති
පිතා සුද්ධොදනො නාම අයං හෙස්සති ගොතමො.

18. කොලිතො උපතිස්සො ච අග්ගා හෙස්සන්ති සාවකා
ආනන්දො නාමු’ පට්ඨාකො උපට්ඨිස්සති තං ජිනං.

19. ඛෙමා උප්පලවණ්ණා ච අග්ගා හෙස්සන්ති සාවිකා
බොධි තස්ස භගවතො අස්සත්ථො’ති පවුච්චති.

20. චිත්තො ච හත්ථාළවකො අග්ගා හෙස්සන්තු’ පට්ඨකා
උත්තරා නන්දමාතා ච අග්ගා හෙස්සන්තු’ පට්ඨිකා
ආයු වස්සසතං තස්ස ගොතමස්ස යසස්සිනො.

21. ඉදං සුත්වාන වචනං අසමස්ස මහෙසිනො
ආමොදිතා නරමරූ බුද්ධබීජඞ්කුරො අයං.

22. උක්කුට්ඨිසද්දං වත්තෙන්ති අප්ඵොටෙන්ති හසන්ති ච
කතඤ්ජලී නමස්සන්ති දසසහස්සී සදෙවකා.

23. යදි’මස්ස ලොකනාථස්ස විරජ්ඣිස්සාම සාසනං
අනාගතම්හි අද්ධානෙ හෙස්සාම සම්මුඛා ඉමං.

24. යථා මනුස්සා නදිං තරන්තා පටිතිත්ථං විරජ්ඣිය
හෙට්ඨා තිත්ථෙ ගහෙත්වාන උත්තරන්ති මහානදිං.

25. එව’මෙව මයං සබ්බෙ යදි මුඤ්චාමි’ මං ජිනං
අනාගතම්හි අද්ධානෙ හෙස්සාම සම්මුඛා ඉමං.