1. කොණ්ඩඤ්ඤස්ස අපරෙන මඞ්ගලො නාම නායකො,
තමං ලොකෙ නිහන්ත්වාන, ධම්මුක්ක’මභිධාරයි.

2. අතුලා’සි පභා තස්ස, ජිනෙහ’ඤ්ඤෙහි උත්තරිං,
චන්ද සුරියප්පභං හන්ත්වා දස සහස්සී විරොචති.

3. සො’පි බුද්ධො පකාසෙසි, චතුරො සච්චවරුත්තමෙ
තෙ තෙ සච්ච රසං පීත්වා, විනොදෙන්ති මහාතමං.

4. පත්වාන බොධි’මතුලං, පඨමෙ ධම්මදෙසනෙ,
කොටිසතසහස්සානං, පඨමා’භිසමයො අහු.

5. සුරින්දදෙවභවනෙ බුද්ධො ධම්මමදෙසයි,
නවකොටිසහස්සානං, දුතියා’භිසමයො අහු.

6. යදා සුනන්දො චක්කවත්ති, සම්බුද්ධං උපසඞ්කමි,
තදා අහනි සම්බුද්ධො, ධම්මභෙරිං වරුත්තමං.

7. සුනන්දස්සා’නුචරා ජනතා, තදා’සුං නවුතිකොටියො,
සබ්බෙ’පි තෙ නිරවසෙසා, අහෙසුං එහිභික්ඛුකා.

8. සන්නිපාතා තයො ආසුං, මඞ්ගලස්ස මහෙසිනො,
කොටිසත සහස්සානං, පඨමො ආසි සමාගමො.

9. දුතියො කොටිසහස්සානං, තතියො නවුති කොටිනං,
ඛීණාසවානං විමලානං, තදා ආසි සමාගමො.

10. අහං තෙන සමයෙන සුරුචී නාම බ්රාහ්මණො,
අජ්ඣායකො මන්තධරො තිණ්ණං වෙදානං පාරගූ.

11. තමහං උපසඞ්කම්ම, සරණං ගන්ත්වාන සත්ථුනො,
සම්බුද්ධපමුඛං සඞ්ඝං ගන්ධමාලෙන පූජයිං
පූජෙත්වා ගන්ධමාලෙන ගවපානෙන තප්පයිං.

12. සො’පි මං බුද්ධො ව්යාකාසි මඞ්ගලො දිපදුත්තමො
අපරිමෙය්යෙ ඉතො කප්පෙ අයං බුද්ධො භවිස්සති.

13. අහු කපිලව්හයා රම්මා නික්ඛමිත්වා තථාගතො
පධානං පදහිත්වාන කත්වා දුක්කරකාරිකං.

14. අජපාලරුක්ඛමූලස්මිං නිසීදිත්වා තථාගතො
තත්ථ පායාසමග්ගය්හ නෙරඤ්ජරමුපෙහිති.

15. නෙරඤ්ජරාය තීරම්හි පායාසං ආදාය සො ජිනො
පටියත්තවරමග්ගෙන බොධිමූලම්හි එහිති.

16. තතො පදක්ඛිණං කත්වා බොධිමණ්ඩං අනුත්තරො
අස්සත්ථරුක්ඛමූලම්හි බුජ්ඣිස්සති මහායසො.

17. ඉමස්ස ජනිකා මාතා මායා නාම භවිස්සති
පිතා සුද්ධොදනො නාම අයං හෙස්සති ගොතමො.

18. කොලිතො උපතිස්සො ච අග්ගා හෙස්සන්ති සාවකා
ආනන්දො නාමු පට්ඨාකො උපට්ඨිස්සති තං ජිනං.

19. ඛෙමා උප්පලවණ්ණා ච අග්ගා හෙස්සන්ති සාවිකා
බොධි තස්ස භගවතො, අස්සත්ථො’ති පවුච්චති.

20. චිත්තො ච හත්ථාළවකො අග්ගා හෙස්සන්තු’පට්ඨකා
උත්තරා නන්ද මාතා ච අග්ගා හෙස්සන්තු’පට්ඨිකා
ආයු වස්ස සතං තස්ස, ගොතමස්ස යසස්සිනො.

21. ඉදං සුත්වාන වචනං අසමස්ස මහෙසිනො
ආමොදිතා නරමරූ බුද්ධ බීජඞ්කුරො අයං.