1. මහාගොතමො ජිනවරො කුසිනාරාය නිබ්බුතො
ධාතු විත්ථාරිකං ආසි තෙසු තෙසු පදෙසතො.

2. එකො අජාතසත්තුස්ස එකො වෙසාලියාපුරෙ
එකො කපිලවත්ථුම්හි එකො ච අල්ලකප්පකෙ.

3. එකො ච රාමගාමම්හි එකො ව වෙඨදීපකෙ
එකො පාවෙය්යකෙ මල්ලෙ එකො ච කොසිනාරකෙ.

4. කුම්භස්ස ථූපං කාරෙසි බ්රාහ්මණො දොණ සව්හයො
අඞ්ගාරථූපං කාරෙසුං මොරියා තුට්ඨ මානසා.

5. අට්ඨසාරීරිකා ථූපා නවමො කුම්භචෙතියො
අඞ්ගාර ථූපො දසමො තදායෙව පතිට්ඨිතො.

6. එකා දාඨා තිදසපුරෙ එකා නාගපුරෙ අහු
එකා ගන්ධාර විසයෙ එකා කාලිඞ්ගරාජිනො

7. චත්තාළීස සමාදන්තා කෙසා ලොමා ච සබ්බසො
දෙවා හරිංසු එකෙකං චක්කවාළ පරම්පරා.

8. මධුරායං භගවතො පත්තො දණ්ඩඤ්ච චීවරං
නිවාසනං කුසඝරෙ පච්චත්ථරණං කපිලව්හයෙ.

9. පාටලිපුත්තනගරෙ කරකං කායබන්ධනං
චම්පායමුදකසාටිකා උණ්ණලොමඤ්ච කොසලෙ.

10. කාසාවඤ්ච බ්රහ්මලොකෙ වෙඨනං තිදසෙ පුරෙ
පාසාණකෙ පදං සෙට්ඨං යඤ්චාපි අච්චුතිප්පදං
නිසීදනං අවන්ති පුරෙ රට්ඨෙ අත්ථරණං තදා

11. අරණී ච මිථිලායං විදෙහෙ පරිස්සාවනං
වාසි සූචිඝරඤ්චා’පි ඉන්දපත්තෙ පුරෙ තදා.

12. පරික්ඛාරං අවසෙසං ජනපදෙ අපරන්තකෙ
පරිභුත්තඤ්ච මුනිනා අකංසු මනුජා තදා.

13. ධාතු විත්ථාරිකං ආසි ගොතමස්ස මහෙසිනො
පාණිනං අනුකම්පාය ආහු පොරාණිකා තදා.