1. අපරිමෙය්යෙ ඉතො කප්පෙ චතුරො ආසුං විනායකා
තණ්හඞ්කරො මෙධඞ්කරො අථො’පි සරණඞ්කරො
දීපඞ්කරො ච සම්බුද්ධො එකකප්පම්හි තෙ ජිනා.

2. දීපඞ්කරස්ස අපරෙන කොණ්ඩඤ්ඤො නාම නායකො
එකො’ව එක කප්පම්හි තාරෙසි ජනතං බහුං.

3. දීපඞ්කරස්ස භගවතො කොණ්ඩඤ්ඤස්ස ච සත්ථුනො
එතෙසං අන්තරා කප්පා ගණනාතො අසඞ්ඛියා.

4. කොණ්ඩඤ්ඤස්ස අපරෙන මඞ්ගලො නාම නායකො
තෙසම්පි අන්තරා කප්පා ගණනාතො අසඞ්ඛියා.

5. මඞ්ගලො ච සුමනො ච රෙවතො සොභිතො මුනි
තෙපි බුද්ධා එක කප්පෙ චක්ඛුමන්තො පභඞ්කරා.

6. සොභිතස්ස අපරෙන අනොමදස්සී මහායසො
තෙසම්පි අන්තරා කප්පා ගණනාතො අසඞ්ඛියා.

7. අනොමදස්සී පදුමො නාරදො චා’පි නායකො
තෙ’ පි බුද්ධා එකකප්පෙ තමන්තකාරකා මුනී.

8. නාරදස්ස අපරෙන පදුමුත්තරො නාම නායකො
එකකප්පම්හි උප්පන්නො තාරෙසි ජනතං බහුං.

9. නාරදස්ස භගවතො පදුමුත්තරස්ස සත්ථුනො
තෙසම්පි අන්තරා කප්පා ගණනාතො අසඞ්ඛියා.

10. කප්පසතසහස්සම්හි එකො ආසි මහාමුනි
පදුමුත්තරො ලොකවිදූ ආහුතීනං පටිග්ගහො.

11. තිංසකප්පසහස්සම්හි දුවෙ ආසුං විනායකා
සුමෙධො ච සුජාතො ච ඔරතො පදුමුත්තරා.

12. අට්ඨාරසෙ කප්පසතෙ තයො ආසුං විනායකා
පියදස්සී අත්ථදස්සී ධම්මදස්සී ච නායකා
ඔරතො ච සුජාතස්ස සම්බුද්ධා ද්විපදුත්තමා.

13. චතුනවුතෙ ඉතො කප්පෙ එකො ආසි මහාමුනි
සිද්ධත්ථො සො ලොකවිදූ සල්ලකත්තො අනුත්තරො.

14. ද්වෙනවුතෙ ඉතො කප්පෙ දුවෙ ආසුං විනායකා
තිස්සො ඵුස්සො ච සම්බුද්ධො අස්මා අප්පටි පුග්ගලා.

15. එකනවුතෙ ඉතො කප්පෙ විපස්සී නාම නායකො
සො’පි බුද්ධො කාරුණිකො සත්තෙ මොචෙසි බන්ධනා.

16. එකතිංසෙ ඉතො කප්පෙ දුවෙ ආසුං විනායකා
සිඛී ච වෙස්සභූ චෙ’ව අස්මා අප්පටිපුග්ගලා.

17. ඉමම්හි භද්දකෙ කප්පෙ තයො ආසුං විනායකා
කකුසන්ධො කොණාගමනො කස්සපො චා’පි නායකො
අහ’මෙතරහි සම්බුද්ධො මෙත්තෙය්යො චා’පි හෙස්සති.

18. එතෙ’පි පඤ්ච සම්බුද්ධා ධීරා ලොකානුකම්පකා
එතෙසං ධම්මරාජූනං අඤ්ඤෙසං නෙක කොටිනං
ආචික්ඛිත්වාන තං මග්ගං නිබ්බුතා තෙ සසාවකා’ති.