1. අහමෙ’තරහි සම්බුද්ධො ගොතමො සක්යවඩ්ඪනො
පධානං පදහිත්වාන පත්තො සම්බොධිමු’ත්තමං.

2. බ්රහ්මුනා යාචිතො සන්තො ධම්මචක්කං පවත්තයිං
අට්ඨාරසන්නං කොටීනං පඨමා’භි සමයො අහු.

3. තතො පරඤ්ච දෙසෙන්තෙ නරමරූනං සමාගමෙ
ගණනාය න වත්තබ්බො දුතියා’භි සමයො අහු.

4. ඉධෙවා’හං එතරහි ඔවදිං මම අත්රජං
ගණනාය න වත්තබ්බො තතියා’භි සමයො අහු.

5. එකො’ව සන්නිපාතො මෙ සාවකානං මහෙසිනං
අඩ්ඪතෙළසසතානං භික්ඛුනාසි සමාගමො.

6. විරොචමානො විමලො භික්ඛුසඞ්ඝස්ස මජ්ඣගො
දදාමී පත්ථිතං සබ්බං මණී’ව සබ්බකාමදො.

7. ඵලමා’කඞ්ඛමානානං භවච්ඡන්දජහෙසිනං
චතුසච්චං පකාසෙමි අනුකම්පාය පාණිනං.

8. දසවීසසහස්සානං ධම්මාභිසමයො අහු
එකද්වින්නං අභිසමයො ගණනාතො අසඞ්ඛියො.

9. විත්ථාරිකං බාහුජඤ්ඤං ඉද්ධං ඵීතං සුඵුල්ලිතං
ඉධ මය්හං සක්යමුනිනො සාසනං සුවිසොධිතං

10. අනාසවා වීතරාගා සන්තචිත්තා සමාහිතා
භික්ඛූ’නෙක සතා සබ්බෙ පරිවාරෙන්ති මං සදා

11. ඉදානි යෙ එතරහි ජහන්ති-මානුසං භවං
අප්පත්තමානසා සෙඛා තෙ භික්ඛු විඤ්ඤූගරහිතා

12. අරියඤ්ජසං ථොමයන්තා සදා ධම්මරතා ජනා
බුජ්ඣිස්සන්ති සතිමන්තො සංසාරසරිතා නරා.

13. නගරං කපිලවත්ථු මෙ රාජා සුද්ධොදනො පිතා
මය්හං ජනෙත්තිකා මාතා මායා දෙවී’ති වුච්චති.

14. එකූනතිංස වස්සානි අගාරමජ්ඣහං වසිං
රම්මො සුරම්මො සුභකො තයො පාසාද මුත්තමා.

15. චත්තාරීස සහස්සානි නාරියො සමලඞ්කතා
භද්දකච්චානා නාම නාරී රාහුලො නාම අත්රජො.

16. නිමිත්තෙ චතුරො දිස්වා අස්සයානෙන නික්ඛමිං
ඡබ්බස්සං පධානචාරං අචරිං දුක්කරං අහං.

17. බාරාණසියං ඉසිපතනෙ ජිනචක්කං පවත්තිතං
අහං ගොතම සම්බුද්ධො සරණො සබ්බපාණිනං.

18. කොලිතො උපතිස්සො ච ද්වෙ භික්ඛු අග්ගසාවකා
ආනන්දො නාමු’පට්ඨාකො සන්තිකාවචරො මම.

19. ඛෙමා උප්පලවණ්ණා ච භික්ඛුනී අග්ග සාවිකා
චිත්තො ච හත්ථාළවකො අග්ගුපට්ඨාකු’පාසකා.

20. උත්තරා නන්දමාතා ච අග්ගුපට්ඨීකු’පාසිකා
අහං අස්සත්ථමූලම්හි පත්තො සම්බොධි මුත්තමං.

21. බ්යාමප්පභා සදා මය්හං සොළසහත්ථමුග්ගතා
අප්පං වස්සසතං ආයු ඉදානෙ’තරහි විජ්ජති
තාවතා තිට්ඨමානො’හං තාරෙමි ජනතං බහුං.