1. තත්ථෙව මණ්ඩකප්පම්හි අසමො අප්පටිපුග්ගලො
වෙස්සභූ නාම නාමෙන ලොකෙ උප්පජ්ජි නායකො.

2. ආදිත්තන්ති ච රාගග්ගි තණ්හානං විජිතං තදා
නාගො’ව බන්ධනං ඡෙත්වා පත්තො සම්බොධිමුත්තමං.

3. ධම්මචක්කං පවත්තෙන්තෙ වෙස්සභූලොකනායකෙ
අසීතිකොටිසහස්සානං පඨමා’භිසමයො අහු.

4. පක්කන්තෙ චාරිකං රට්ඨෙ ලොකජෙට්ඨෙ නරාසභෙ
සත්තති කොටිසහස්සානං දුතියා’භිසමයො අහු.

5. මහාදිට්ඨිං විනොදෙන්තො පාටිහීරං කරොති සො
සමාගතා නරමරූ දසසහස්සී සදෙවකෙ.

6. මහා අච්ඡරියං දිස්වා අබ්භුතං ලොමහංසනං
දෙවා චෙ ව මනුස්සා ච බුජ්ඣරෙ සට්ඨිකොටියො.

7. සන්නිපාතා තයො ආසුං වෙස්සභුස්ස මහෙසිනො
ඛීණාසවානං විමලානං සන්තචිත්තාන’තාදිනං.

8. අසීතිභික්ඛුසහස්සානං පඨමො ආසි සමාගමො
සත්තතිභික්ඛුසහස්සානං දුතියො ආසි සමාගමො.

9. සට්ඨි භික්ඛුසහස්සානං තතියො ආසි සමාගමො
ජරාදි භයා’තීතානං ඔරසානං මහෙසිනො.

10. අහං තෙන සමයෙන සුදස්සනො නාම ඛත්තියො
නිමන්තෙත්වා මහාවීරං දානං දත්වා මහාරහං
අන්නපානෙන වත්ථෙන සසඞ්ඝං ජිනමපූජයිං.

11. තස්ස බුද්ධස්ස අසමස්ස චක්කං වත්තිත’මුත්තමං
සුත්වාන පණීතං ධම්මං පබ්බජ්ජ’මභිරොචයිං.

12. මහාදානං පවත්තෙත්වා රත්තිං දිවමතන්දිතො
පබ්බජ්ජං ගුණසම්පන්නං පබ්බජිං ජිනසන්තිකෙ.

13. ආචාරගුණසම්පන්නො වත්තසීලසමාහිතො
සබ්බඤ්ඤුතං ගවෙසන්තො රමාමී ජිනසාසනෙ

14. සද්ධාපීතිමු’පාගන්ත්වා පාදෙ වන්දාමි සත්ථරි
පීති උප්පජ්ජතී මය්හං බොධියායෙ’ව කාරණා.

15. අනිවත්තිමානසං ඤත්වා සම්බුද්ධො එතද’බ්රවි
එකතිංසෙ ඉතො කප්පෙ අයං බුද්ධො භවිස්සති.

16. අහූ කපිලව්හයා රම්මා නික්ඛමිත්වා තථාගතො
පධානං පදහිත්වාන කත්වා දුක්කරකාරිකං.

17. අජපාලරුක්ඛමූලම්හි නිසීදිත්වා තථාගතො
තත්ථ පායාසං පග්ගය්හ නෙරංජරමුපෙහිති.

18. නෙරඤ්ජරාය තීරම්හි පායාසං ආදාය සො ජිනො
පටියත්තවරමග්ගෙන බොධිමූලමුපෙහිති.

19. තතො පදක්ඛිණං කත්වා බොධිමණ්ඩං අනුත්තරො
අස්සත්ථරුක්ඛමූලම්හි බුජ්ඣිස්සති මහායසො.

20. ඉමස්ස ජනිකා මාතා මායා නාම භවිස්සති
පිතා සුද්ධොදනො නාම අයං හෙස්සති ගොතමො.

21. අනාසවා වීතරාගා සන්තචිත්තා සමාහිතා
කොලිතො උපතිස්සො ච අග්ගා හෙස්සන්ති සාවකා
ආනන්දො නාමු’පට්ඨාකො උපට්ඨිස්සති තං ජිනං