1. වෙස්සභුස්ස අපරෙන සම්බුද්ධො දිපදුත්තමො
කකුසන්ධො නාම නාමෙන අප්පමෙය්යා දුරාසදො

2. උග්ඝාටෙත්වා සබ්බභවං චරියාපාරමිං ගතො
සීහො’ච පඤ්ජරං භෙත්වා පත්තො සම්බොධිමුත්තමං.

3. ධම්මචක්කං පවත්තෙන්තෙ කකුසන්ධෙ ලොකනායකෙ
චත්තාළීස කොටිසහස්සානං පඨමා’භිසමයො අහු.

4. අන්තලික්ඛම්හි ආකාසෙ යමකං කත්වා විකුබ්බනං
තිංසකොටිසහස්සානං බොධෙසි දෙවමානුසෙ.

5. නරදෙවස්ස යක්ඛස්ස චතුසච්චප්පකාසනෙ
ධම්මා’භිසමයො තස්ස ගණනාතො අසඞ්ඛියො.

6. කකුසන්ධස්ස භගවතො එකො ආසිසමාගමො
ඛීණාසවානං විමලානං සන්තචිත්තාන තාදිනං.

7. චත්තාළීසසහස්සානං තදා ආසි සමාගමො
දන්ත භූමිමනුප්පත්තානං ආසවාරිගණක්ඛයා

8. අහං තෙන සමයෙන ඛෙමො නාමාසිං ඛත්තියො
තථාගතෙ ජිනපුත්තෙ ච දානං දත්වා අනප්පකං.

9. පත්තඤ්ච චීවරං දත්වා අඤ්ජනං මධුලට්ඨිකං
ඉමෙතං පත්ථිතං සබ්බං පටියාදෙමි වරං වරං.

10. සො’පි මං මුනි ව්යාකාසි කකුසන්ධො ලොකනායකො
ඉමම්හි භද්දකෙ කප්පෙ අයං බුද්ධො භවිස්සති.

11. අහු කපිලව්හයා රම්මා නික්ඛමිත්වා තථාගතො
පධානං පදහිත්වාන කත්වා දුක්කරකාරිකං.

12. අජපාලරුක්ඛමූලම්හි නිසීදිත්වා තථාගතො
තත්ථ පායාසමග්ගය්හ නෙරඤ්ජරමුපෙහිති.

13. නෙරඤ්ජරා නදීතීරෙ පායාසං ආදාය සො ජිනො,
පටියත්තවරමග්ගෙන බොධිමූල’මුපෙහිති.

14. තතො පදක්ඛිණං කත්වා බොධිමණ්ඩං අනුත්තරො
අස්සත්ථමූලෙ සම්බොධිං බුජ්ඣිස්සති මහායසො.

15. ඉමස්ස ජනිකා මාතා මායා නාම භවිස්සති
පිතා සුද්ධොදනො නාම අයං හෙස්සති ගොතමො.

16. අනාසවා වීතරාගා සන්තචිත්තා සමාහිතා
කොලිතො උපතිස්සො ච අග්ගා හෙස්සන්ති සාවකා
ආනන්දො නාමුපට්ඨාකො උපට්ඨිස්සති තං ජිනං.

17. ඛෙමා උප්පලවණ්ණා ච අග්ගා හෙස්සන්ති සාවිකා
බොධි තස්ස භගවතො අස්සත්ථො’ති පවුච්චති.

18. චිත්තො ච හත්ථාළවකො අග්ගා හෙස්සන්තු’පට්ඨකා
උත්තරා නන්දමාතා ච අග්ගා හෙස්සන්තු’පට්ඨිකා
ආයු වස්සසතං තස්ස ගොතමස්ස යසස්සිනො.

19. ඉදං සුත්වාන වචනං අසමස්ස මහෙසිනො
ආමොදිතා නරමරූ බුද්ධ බීජඞ්කුරො අයං.

20. උක්කුට්ඨි සද්දං වත්තෙන්ති අප්ඵොඨෙන්ති හසන්ති ච
කතඤ්ජලී නමස්සන්ති දසසහස්සී සදෙවකා.

21. යදිමස්ස ලොකනාථස්ස විරජ්ඣිස්සාම සාසනං
අනාගතම්හි අද්ධානෙ හෙස්සාම සම්මුඛා ඉමං.

22. යථා මනුස්සා නදිං තරන්තා පටිතිත්ථං විරජ්ඣිය
හෙට්ඨා තිත්ථෙ ගහෙත්වාන උත්තරන්ති මහානදිං.