1. විපස්සිස්ස අපරෙන සම්බුද්ධො දිපදුත්තමො
සිඛිව්හයො ආසි ජිනො අසමො අප්පටිපුග්ගලො.

2. මාරසෙනං පමද්දිත්වා පත්තො සම්බොධිමුත්තමං
ධම්මචක්කං පවත්තෙසි අනුකම්පාය පාණිනං.

3. ධම්මචක්කං පවත්තෙන්තෙ සිඛිම්හි මුනි පුඞ්ගවෙ
කොටිසතසහස්සානං පඨමා’භිසමයො අහු.

4. අපරම්පි ධම්මං දෙසෙන්තො ගණසෙට්ඨෙ නරුත්තමෙ
නවුතිකොටිසහස්සානං දුතියා’භිසමයො අහු.

5. යමකං පාටිහීරඤ්ච දස්සයන්තෙ සදෙවකෙ
අසීතිකොටිසහස්සානං තතියා’භිසමයො අහු.

6. සන්නිපාතා තයො ආසුං සිඛිස්ස’පි මහෙසිනො
ඛීණාසවානං විමලානං සන්තචිත්තාන’තාදිනං.

7. භික්ඛුසතසහස්සානං පඨමො ආසි සමාගමො
අසීති භික්ඛුසහස්සානං දුතියො ආසි සමාගමො.

8. සත්තති භික්ඛුසහස්සානං තතියො ආසි සමාගමො
අනුපලිත්තො පදුමං’ව තොයම්හි සම්පවඩ්ඪිතං.

9. අහං තෙන සමයෙන අරින්දමො නාම ඛත්තියො
සම්බුද්ධපමුඛං සඞ්ඝං අන්නපානෙන තප්පයිං.

10. බහුං දුස්සවරං දත්වා දුස්සකොටිං අනප්පකං
අලඞ්කතං හත්ථියානං සම්බුද්ධස්ස අදාස’හං.

11. හත්ථියානං නිම්මිනිත්වා කප්පියං උපනාමයිං
පූරයිං මානසං මය්හං නිච්චං දළ්හමුපට්ඨිතං.

12. සො’පි මං බුද්ධො ව්යාකාසි සිඛීලොකග්ගනායකො
එකතිංසෙ ඉතො කප්පෙ අයං බුද්ධො භවිස්සති.

13. අහූකපිලව්හයා රම්මා නික්ඛමිත්වා තථාගතො
පධානං පදහිත්වාන කත්වා දුක්කර කාරිකං.

14. අජපාලරුක්ඛමූලම්හි නිසීදිත්වා තථාගතො
තත්ථ පායාසමග්ගය්හ නෙරඤ්ජරමුපෙහිති.

15. නෙරඤ්ජරාය තීරම්හි පායාසං ආදාය සො ජිනො,
පටියත්තවරමග්ගෙන බොධිමූල’මුපෙහිති.

16. තතො පදක්ඛිණං කත්වා බොධිමණ්ඩං අනුත්තරො
අස්සත්ථරුක්ඛමූලම්හි බුජ්ඣිස්සති මහායසො.

17. ඉමස්ස ජනිකා මාතා මායා නාම භවිස්සති
පිතා සුද්ධොදනො නාම අයං හෙස්සති ගොතමො.

18. අනාසවා වීතරාගා සන්තචිත්තා සමාහිතා
කොලිතො උපතිස්සො ච අග්ගා හෙස්සන්ති සාවකා
ආනන්දො නාමු’පට්ඨාකො උපට්ඨිස්සති තං ජිනං.

19. ඛෙමා උප්පලවණ්ණා ච අග්ගා හෙස්සන්ති සාවිකා
බොධි තස්ස භගවතො අස්සත්ථො’ති පවුච්චති.

20. චිත්තො ච හත්ථාළවකො අග්ගා හෙස්සන්තු’පට්ඨකා
උත්තරා නන්දමාතා ච අග්ගා හෙස්සන්තු’පට්ඨිකා
ආයු වස්සසතං තස්ස ගොතමස්ස යසස්සිනො.

21. ඉදං සුත්වාන වචනං අසමස්ස මහෙසිනො
ආමොදිතා නරමරූ බුද්ධබීජඞ්කුරො අයං.

22. උක්කුට්ඨි සද්දං පවත්තෙන්ති අප්ඵොටෙන්ති හසන්ති ච
කතඤ්ජලී නමස්සන්ති දසසහස්සී සදෙවකා.