1. සිද්ධත්ථ අපරෙන අස්සමො අප්පටිපුග්ගලො
අනන්තතෙජො අමිතයසො තිස්සො ලොකග්ගනායකො.

2. තම’න්ධකාරං විධමෙත්වා ඔභාසෙත්වා සදෙවකං
අනුකම්පකො මහා වීරො ලොකෙ උප්පජ්ජි චක්ඛුමා.

3. තස්සා’පි අතුලා ඉද්ධි අතුලං සීලං සමාධි ච
සබ්බත්ථ පාරමිං ගන්ත්වා ධම්මචක්කං පවත්තයී.

4. සො බුද්ධො දසසහස්සිම්හි විඤ්ඤාපෙසි ගිරං සුචිං
කොටිසතානි අභිසමිංසු පඨමෙ ධම්මදෙසනෙ.

5. දුතියො නවුතිකොටීනං තතියො සට්ඨිකොටියො
බන්ධනාතො පමොචෙසි සම්පත්තෙ නරමරූ තදා.

6. සන්නිපාතා තයො ආසුං තිස්සෙ ලොකග්ගනායකෙ
ඛීණාසවානං විමලානං සන්තචිත්තාන තාදිනං.

7. ඛීණාසවසතසහස්සානං පඨමො ආසි සමාගමො
නවුති සත සහස්සානං දුතියො ආසි සමාගමො.

8. අසීති සතසහස්සානං තතියො ආසි සමාගමො
ඛීණාසවානං විමලානං පුප්ඵිතානං විමුත්තියා.

9. අහං තෙන සමයෙන සුජාතො නාම ඛත්තියො
මහාභොගං ඡඩ්ඪයිත්වා පබ්බජිං ඉසිපබ්බජං.

10. මයි පබ්බජිතෙ සන්තෙ උප්පජ්ජි ලොකනායකො
බුද්ධො’ති සද්දං සුත්වාන පීති මෙ උපපජ්ජථ.

11. දිබ්බං මන්දාරවං පුප්ඵං පදුමං පාරිච්ඡත්තකං
උභො හත්ථෙහි පග්ගය්හ ධුනමානො උපාගමිං.

12. චාතුවණ්ණපරිවුතං තිස්සං ලොකග්ගනායකං
තම’හං පුප්ඵං ගහෙත්වාන මත්ථකෙ ධාරයිං ජිනං.

13. සො’පි බුද්ධො ව්යාකාසි ජනමජ්ඣෙ නිසීදිය
ද්වෙනවුතෙ ඉතො කප්පෙ අයං බුද්ධො භවිස්සති.

14. අහු කපිලව්හයා රම්මං නික්ඛමිත්වා තථාගතො
පධානං පදහිත්වාන කත්වා දුක්කරකාරිකං.

15. අජපාලරුක්ඛමූලම්හි නිසීදිත්වා තථාගතො
තත්ථපායාසමග්ගය්හ නෙරඤ්ජරමුපෙහිති.

16. නෙරඤ්ජරාය තීරම්හි පායාසං ආදාය සො ජිනො
පටියත්තවරමග්ගෙන බොධිමූලම්හි එහිති.

17. තතො පදක්ඛිණං කත්වා බොධිමණ්ඩං අනුත්තරො
අස්සත්ථරුක්ඛමූලම්හි බුජ්ඣිස්සති මහායසො.

18. ඉමස්ස ජනිකා මාතා මායා නාම භවිස්සති
පිතා සුද්ධොදනො නාම අයං හෙස්සති ගොතමො.

19. කොලිතො උපතිස්සො ච අග්ගා හෙස්සන්ති සාවකා
ආනන්දො නා’මුපට්ඨාකො උපට්ඨිස්සති තං ජිනං.

20. ඛෙමා උප්පලවණ්ණා ච අග්ගා හෙස්සන්ති සාවිකා
බොධි තස්ස භගවතො අස්සත්ථො’ති පවුච්චති.

21. චිත්තො ච හත්ථාළවකො අග්ගා හෙස්සන්තු’පට්ඨකා
උත්තරා නන්ද මාතා ච අග්ගා හෙස්සන්තු’ පට්ඨිකා
ආයුවස්සසතං තස්ස ගොතමස්ස යසස්සිනො.

22. ඉදං සුත්වාන වචනං අසමස්ස මහෙසිනො
ආමොදිතා නරමරූ බුද්ධබීජඞ්කුරො අයං.

23. උක්කුට්ඨි සද්දං වත්තෙන්ති අප්ඵොටෙන්ති හසන්ති ච
කතඤ්ජලී නමස්සන්ති දසසහස්සී සදෙවකා.