1. තත්ථෙ’ව මණ්ඩකප්පම්හි අහු සත්ථා අනුත්තරො
අනුපමො අසදිසො ඵුස්සො ලොකග්ගනායකො.

2. සො’පි සබ්බං තමං හන්ත්වා විජටෙත්වා මහාජටං
සදෙවකං තප්පයන්තො අභිවස්සී අමතම්බුනා.

3. ධම්මචක්කං පවත්තෙන්තෙ ඵුස්සෙ නක්ඛත්තමඞ්ගලෙ
කොටිසතසහස්සානං පඨමා’භිසමයො අහු.

4. නවුතිසතසහස්සානං දුතියා’භිසමයො අහු
අසීතිසතසහස්සානං තතියා’භිසමයො අහු.

5. සන්නිපාතා තයො ආසුං ඵුස්සස්ස’පි මහෙසිනො
ඛීණාසවානං විමලානං සන්තචිත්තාන’තාදිනං.

6. සට්ඨිසතසහස්සානං පඨමො ආසි සමාගමො
පඤ්ඤාසසතසහස්සානං දුතියො ආසි සමාගමො.

7. චත්තාරීසසතසහස්සානං තතියො ආසි සමාගමො
අනුපාදා විමුත්තානාං වොච්ඡින්නපටිසන්ධිනං.

8. අහං තෙන සමයෙන විජිතාවි නාම ඛත්තියො
ඡඩ්ඩයිත්වා මහාරජ්ජං පබ්බජිං තස්ස සන්තිකෙ.

9. සො’පි මං බුද්ධො ව්යාකාසි ඵුස්සො ලොකග්ගනායකො
ඉතො ද්වෙ නවුති කප්පෙ අයං බුද්ධො භවිස්සති.

10. අහු කපිලව්හයා රම්මා නික්ඛමිත්වා තථාගතො
පධානං පදහිත්වාන කත්වා දුක්කරකාරිකං.

11. අජපාලරුක්ඛමූලම්හි නිසීදිත්වා තථාගතො
තත්ථ පායාසමග්ගය්හ නෙරඤ්ජරමුපෙහිති.

12. නෙරඤ්ජරාය තීරම්හි පායාසං ආදාය සො ජිනො
පටියත්තවරමග්ගෙන බොධිමූලම්හි එහිති.

13. තතො පදක්ඛිණං කත්වා බොධිමණ්ඩං අනුත්තරො
අස්සත්ථරුක්ඛමූලම්හි බුජ්ඣිස්සති මහායසො.

14. ඉමස්ස ජනිකා මාතා මායා නාම භවිස්සති
පිතා සුද්ධොදනො නාම අයං හෙස්සති ගොතමො.

15. කොලිතො උපතිස්සො ච අග්ගා හෙස්සන්ති සාවකා
ආනන්දො නාමු’පට්ඨාකො උපට්ඨිස්සති තං ජිනං.

16. ඛෙමා උප්පලවණ්ණා ච අග්ගා හෙස්සන්ති සාවිකා
බොධි තස්ස භගවතො අස්සත්ථො’ති පවුච්චති.

17. චිත්තො ච හත්ථාළවකො අග්ගා හෙස්සන්තු’පට්ඨකා
උත්තරා නන්දමාතා ච අග්ගා හෙස්සන්තු’පට්ඨිකා
ආයු වස්ස සතං තස්ස ගොතමස්ස යසස්සිනො.

18. ඉදං සුත්වාන වචනං අසමස්ස මහෙසිනො
ආමොදිතා නරමරූ බුද්ධබීජඞ්කුරො අයං.

19. උක්කුට්ඨි සද්දං වත්තෙන්ති අප්ඵොඨෙන්ති හසන්ති ච
කතඤ්ජලී නමස්සන්ති දසසහස්සී සදෙවකා.

20. යදි’මස්ස ලොකනාථස්ස විරජ්ඣිස්සාම සාසනං
අනාගතම්හි අද්ධානෙ හෙස්සාම සම්මුඛා ඉමං.

21. යථා මනුස්සා නදිං තරන්තා පටිතිත්ථං විරඣිය
හෙට්ඨා තිත්ථෙ ගහෙත්වාන උත්තරන්ති මහානදිං.

22. එව’මෙව මයං සබ්බෙ යදි මුඤ්චාමි’මං ජිනං
අනාගතම්හි අද්ධානෙ හෙස්සාම සම්මුඛා ඉමං.

23. තස්සා’පි වචනං සුත්වා භිය්යො චිත්තං පසාදයිං
උත්තරිං වත මධිට්ඨාසිං දසපාරමිපූරියා.

24. සුත්තන්තං විනයඤ්චා’පි නවඞ්ගං සත්ථුසාසනං
සබ්බං පරියාපුණිත්වාන සොභයිං ජිනසාසනං.