1. ධම්මදස්සිස්ස අපරෙන සිද්ධත්ථො ලොකනායකො
නිහනිත්වා තමං සබ්බං සුරියො අබ්භුග්ගතො යථා

2. සො’පි පත්වාන සම්බොධිං සන්තාරෙන්තො සදෙවකං
අභිවස්සි ධම්මමෙඝෙන නිබ්බාපෙන්තො සදෙවකං.

3. තස්සා’පි අතුලතෙජස්ස අහෙසුං අභිසමයා තයො
කොටිසතසහස්සානං පඨමා’භිසමයො අහු.

4. පුනා’පරං භීමරථෙ යදා අහනි දුන්දුභිං
තදා නවුතිකොටීනං දුතියා’භි සමයො අහු.

5. යදා බුද්ධො ධම්මං දෙසෙසි වෙහාරෙ සො පුරුත්තමෙ
තදා නවුති කොටීනං තතියා’භිසමයො අහු.

6. සන්නිපාතා තයො ආසුං තස්මි’ම්පි දිපදුත්තමෙ
ඛීණාසවානං විමලානං සන්තචිත්තාන’තාදිනං.

7. කොටිසතානං නවුතීනං අසීතියා ච කොටීනං
එතෙ ආසුං තයො ඨානා විමලානං සමාගමෙ.

8. අහං තෙන සමයෙන මඞ්ගලො නාම තාපසො
උග්ගතෙජො දුප්පසහො අභිඤ්ඤාබලසමාහිතො.

9. ජම්බුතො ඵලමා’නෙත්වා සිද්ධත්ථස්ස අදාස’හං
පටිග්ගහෙත්වා සම්බුද්ධො ඉදං වචන’මබ්රුවි.

10. පස්සථ ඉමං තාපසං ජටිලං උග්ගතාපනං
චතුනවුතෙ ඉතො කප්පෙ අයං බුද්ධො භවිස්සති.

11. අහු කපිලව්හයා රම්මා නික්ඛමිත්වා තථාගතො
පධානං පදහිත්වාන කත්වා දුක්කරකාරිකං.

12. අජපාලරුක්ඛමූලම්හි නිසීදිත්වා තථාගතො
තත්ථ පායාසමග්ගය්හ නෙරඤ්ජරමුපෙහිති.

13. නෙරඤ්ජරාය තීරම්හි පායාසං ආදාය සො ජිනො
පටියත්තවරමග්ගෙන බොධිමූලංහි එහිති.

14. තතො පදක්ඛිණං කත්වා බොධිමණ්ඩං අනුත්තරො
අස්සත්ථරුක්ඛමූලම්හි බුජ්ඣිස්සති මහායසො.

15. ඉමස්ස ජනිකා මාතා, මායා නාම භවිස්සති
පිතා සුද්ධොදනො නාම අයං හෙස්සති ගොතමො.

16. කොලිතො උපතිස්සො ච අග්ගා හෙස්සන්ති සාවකා
ආනන්දො නාමු’පට්ඨාකො, උපට්ඨිස්සති තං ජිනං.

17. ඛෙමා උප්පලවණ්ණා ච අග්ගා හෙස්සන්ති සාවිකා
බොධි තස්ස භගවතො අස්සත්ථො’ති පවුච්චති.

18. චිත්තො ච හත්ථාළවකො, අග්ගා හෙස්සන්තු’පට්ඨකා
උත්තරා නන්දමාතා ච අග්ගා හෙස්සන්තු’පට්ඨිකා
ආයු වස්ස සතං තස්ස ගොතමස්ස යසස්සිනො.

19. ඉදං සුත්වාන වචනං අසමස්ස මහෙසිනො
ආමොදිතා නරමරූ බුද්ධබීජඞ්කුරො අයං.

20. උක්කුට්ඨිසද්දා වත්තන්ති අප්ඵොටෙන්ති හසන්තිච
කතඤ්ජලී, නමස්සන්ති දසසහස්සීසදෙවකා.

21. යදිමස්ස ලොකනාථස්ස විරජ්ඣිස්සාම සාසනං
අනාගතම්හි අද්ධානෙ හෙස්සාම සම්මුඛා ඉමං.

22. යථා මනුස්සා නදිං තරන්තා පටිතිත්ථං විරජ්ඣිය
හෙට්ඨා තිත්ථං ගහෙත්වාන උත්තරන්ති මහානදිං.

23. එව’මෙව මයං සබ්බෙ යදි මුඤ්චාමි’මං ජිනං
අනාගතම්හි අද්ධානෙ හෙස්සාම සම්මුඛා ඉමං.

24. තස්සා’පි වචනං සුත්වා භිය්යො චිත්තං පසාදයිං
උත්තරිං වතමධිට්ඨාසිං දසපාරමි පූරියා.

25. වෙභාරං නාම නගරං උදෙනො නාම ඛත්තියො
සුඵස්සා නාම ජනිකා සිද්ධත්ථස්ස මහෙසිනො.