1. තත්ථෙ’ව මණ්ඩකප්පම්හි ධම්මදස්සී මහායසො
තම’න්ධකාරං විධමෙත්වා අතිරොචති සදෙවකෙ.

2. තස්සා’පි අතුලතෙජස්ස ධම්මචක්කප්පවත්තනෙ
කොටිසතසහස්සානං පඨමා’භි සමයො අහු.

3. යදා බුද්ධො ධම්මදස්සී විනෙසි සඤ්ජයං ඉසිං
තදා නවුතිකොටීනං දුතියා’භිසමයො අහු.

4. යදා සක්කො උපගඤ්ඡි සහපරිසො විනායකං
තදා අසීති කොටීනං තතියා’භිසමයො අහු.

5. තස්සා’පි දෙවදෙවස්ස සන්නිපාතා තයො අහු
ඛීණාසවානං විමලානං සන්තචිත්තාන’තාදිනං.

6. යදා බුද්ධො ධම්මදස්සී සරණෙ වස්සං උපාගමී
තදා කොටිසහස්සානං පඨමො ආසි සමාගමො.

7. පුනා’පරං යදා බුද්ධො දෙවතො එති මානුසං
තදා’පි සතකොටීනං දුතියො ආසි සමාගමො.

8. පුනා’පරං යදා බුද්ධො පකාසෙසි ධුතෙ ගුණෙ
තදා අසීති කොටීනං තතියො ආසි සමාගමො.

9. අහං තෙන සමයෙන සක්කො ආසිං පුරින්දදො
දිබ්බෙන ගන්ධමාලෙන තුරියෙන අභිපූජයිං.

10. සො’පි මං බුද්ධො ව්යාකාසි දෙවමජ්ඣෙ නිසීදිය
අට්ඨාරසෙ කප්පසතෙ අයං බුද්ධො භවිස්සති.

11. අහු කපිලව්හයා රම්මා නික්ඛමිත්වා තථාගතො
පධානං පදහිත්වාන කත්වා දුක්කරකාරිකං.

12. අජපාලරුක්ඛමූලස්මිං නිසීදිත්වා තථාගතො
තත්ථ පායාසමග්ගය්හ නෙරඤ්ජරමුපෙහිති.

13. නෙරඤ්ජරාය තීරම්හි පායාසං ආදාය සො ජිනො
පටියත්තවරමග්ගෙන බොධිමූලම්හි එහිති.

14. තතො පදක්ඛිණං කත්වා බොධිමණ්ඩං අනුත්තරො
අස්සත්ථරුක්ඛමූලම්හි බුජ්ඣිස්සති මහායසො.

15. ඉමස්ස ජනිකා මාතා මායා නාම භවිස්සති
පිතා සුද්ධොදනො නාම අයං හෙස්සති ගොතමො.

16. කොලිතො උපතිස්සො ච අග්ගා හෙස්සන්ති සාවකා
ආනන්දො නාමු’පට්ඨාකො උපට්ඨිස්සති තං ජිනං.

17. ඛෙමා උප්පලවණ්ණා ච අග්ගා හෙස්සන්ති සාවිකා
බොධි තස්ස භගවතො අස්සත්ථො’ති පවුච්චති.

18. චිත්තො ච හත්ථාළවකො අග්ගා හෙස්සන්තු’පට්ඨකා
උත්තරා නන්දමාතා ච අග්ගා හෙස්සන්තු’පට්ඨිකා
ආයු වස්සසතං තස්ස ගොතමස්ස යසස්සිනො.

19. ඉදං සුත්වාන වචනං අසමස්ස මහෙසිනො
ආමොදිතා නරමරූ බුද්ධබීජඞ්කුරො අයං.

20. උක්කුට්ඨිසද්දං වත්තෙන්ති අප්ඵොටෙන්ති හසන්ති ච
කතඤ්ජලී නමස්සන්ති දසසහස්සී සදෙවකා.

21. යදි’මස්ස ලොකනාථස්ස විරජ්ඣිස්සාම සාසනං
අනාගතම්හි අද්ධානෙ හෙස්සාම සම්මුඛා ඉමං.

22. යථා මනුස්සා නදිං තරන්තා පටිතිත්ථං විරජ්ඣිය
හෙට්ඨා තිත්ථෙ ගහෙත්වාන උත්තරන්ති මහානදිං.

23. එව’මෙව මයං සබ්බෙ යදි මුඤ්චාමි’මං ජිනං
අනාගතම්හි අද්ධානෙ හෙස්සාම සම්මුඛා ඉමං.

24. තස්සා’පි වචනං සුත්වා භිය්යො චිත්තං පසාදයිං
උත්තරිං වතමධිට්ඨාසිං දසපාරමිපූරියා.

25. සරණං නාම නගරං සරණො නාම ඛත්තියො
සුනන්දා නාම ජනිකා ධම්මදස්සිස්ස සත්ථුනො.