1. නාරදස්ස අපරෙන සම්බුද්ධො දිපදුත්තමො
පදුමුත්තරො නාම ජිනො අක්ඛොභො සාගරූපමො.

2. මණ්ඩකප්පො’ව සො ආසි යම්හි බුද්ධො අජායථ
උස්සන්තකුසලා ජනතා තම්හි කප්පෙ අජායථ.

3. පදුමුත්තරස්ස භගවතො පඨමෙ ධම්මදෙසනෙ
කොටිසතසහස්සානං ධම්මාභිසමයො අහු.

4. තතො පරම්පි වස්සන්තෙ තප්පයන්තෙ ච පාණිනො
සත්තතිංසසතසහස්සානං දුතියා’භිසමයො අහූ.

5. යම්හි කාලෙ මහාවීරො ආනන්දං උපසඞ්කමි
පිතුසන්තිකමුපාගන්ත්වා අහනි අමතදුන්දුභිං.

6. ආහතෙ අමතභෙරිම්හි වස්සන්තෙ ධම්මවුට්ඨියා
පඤ්ඤාසසතසහස්සානං තතියා’භිසමයො අහු.

7. ඔවාදකො විඤ්ඤාපකො තාරකො සබ්බපාණිනං
දෙසනාකුසලො බුද්ධො තාරෙසි ජනතං බහුං.

8. සන්නිපාතා තයො ආසුං පදුමුත්තරස්ස සත්ථුනො
කොටිසතසහස්සානං පඨමො ආසි සමාගමො.

9. යදා බුද්ධො අසමසමො වසී වෙහාරපබ්බතෙ
නවුතිකොටිසහස්සානං දුතියො ආසි සමාගමො.

10. පුන චාරිකං පක්කන්තෙ ගාමනිගමරට්ඨතො
අසීතිකොටිසහස්සානං තතියො ආසි සමාගමො.

11. අහං තෙන සමයෙන ජටිලො නාම රට්ඨිකො
සම්බුද්ධපමුඛං සඞ්ඝං සහත්තං දුස්සම’දාස’හං.

12. සො’පි මං බුද්ධො ව්යාකාසි සඞ්ඝමජ්ඣෙ නිසීදිය
සතසහස්සෙ ඉතො කප්පෙ අයං බුද්ධො භවිස්සති.

13. අහු කපිලව්හයා රම්මා නික්ඛමිත්වා තථාගතො.
පධානං පදහිත්වාන කත්වා දුක්කරකාරිකං.

14. අජපාලරුක්ඛමූලස්මිං නිසීදිත්වා තථාගතො
තත්ථ පායාසමග්ගය්හ නෙරඤ්ජරමුපෙහිති.

15. නෙරඤ්ජරාය තීරම්හි පායාසං ආදාය සො ජිනො
පටියත්තවරමග්ගෙන බොධිමූලම්හි එහිති.

16. තතො පදක්ඛිණං කත්වා බොධිමණ්ඩං අනුත්තරො
අස්සත්ථරුක්ඛමූලම්හි බුජ්ඣිස්සති මහායසො.

17. ඉමස්ස ජනිකා මාතා මායා නාම භවිස්සති
පිතා සුද්ධොදනො නාම අයං හෙස්සති ගොතමො.

18. කොලිතො උපතිස්සො ච අග්ගා හෙස්සන්ති සාවකා
ආනන්දො නාමු’පට්ඨාකො උපට්ඨිස්සති තං ජිනං.

19. ඛෙමා උප්පලවණ්ණා ච අග්ගාහෙස්සන්ති සාවිකා
බොධි තස්ස භගවතො අස්සත්ථොති පවුච්චති.

20. චිත්තො ච හත්ථාළවකො අග්ගා හෙස්සන්තු’පට්ඨකා
උත්තරා නන්දමාතා ච අග්ගා හෙස්සන්තු’පට්ඨිකා
ආයු වස්සසතං තස්ස ගොතමස්ස යසස්සිනො.

21. ඉදං සුත්වාන වචනං අසමස්ස මහෙසිනො
ආමොදිතා නරමරූ බුද්ධබීජඞ්කුරො අයං.

22. උක්කුට්ඨිසද්දං වත්තෙන්ති අප්ඵොටෙන්ති හසන්ති ච
කතඤ්ජලී නමස්සන්ති දසසහස්සී සදෙවකා.