1. පදුමුත්තරස්ස අපරෙන සුමෙධො නාම නායකො
දුරාසදො උග්ගතෙජො සබ්බලොකුත්තමො මුනි.

2. පසන්නනෙත්තො සුමුඛො බ්රහා උජු පතාපවා
හිතෙසී සබ්බසත්තානං බහූ මොචෙසි බන්ධනා.

3. යදා බුද්ධො පාපුණිත්වා කෙවලං බොධිමුත්තමං
සුදස්සනම්හි නගරෙ ධම්මචක්කං පවත්තයි,

4. තස්සාභිසමයා තීණි අහෙසුං ධම්මදෙසනෙ
කොටිසතසහස්සානං පඨමා’භිසමයො අහු.

5. පුනාපරං කුම්භකණ්ණං යක්ඛං සො දමයී ජිනො
නවුති කොටිසහස්සානං දුතියාභි සමයො අහු.

6. පුනාපරං අමිතයසො චතුසච්චං පකාසයි
අසීති කොටිසහස්සානං තතියාභිසමයො අහු.

7. සන්නිපාතා තයො ආසුං සුමෙධස්ස මහෙසිනො
ඛීණාසවානං විමලානං සන්තචිත්තාන’තාදිනං.

8. සුදස්සනං නගරවරං උපගඤ්ඡි ජිනො යදා
තදා ඛීණාසවා භික්ඛු සමිංසු සතකොටියො.

9. පුනාපරං දෙවකූටෙ භික්ඛූනං කඨිනත්ථතෙ
තදා නවුති කොටීනං දුතියො ආසි සමාගමො.

10. පුනාපරං දසබලො යදා චරති චාරිකං
තදා අසීතිකොටීනං තතියො ආසි සමාගමො.

11. අහං තෙන සමයෙන උත්තරො නාම මාණවො
අසීතිකොටියො මය්හං ඝරෙ සන්නිචිතං ධනං.

12. කෙවලං සබ්බං දත්වාන සසඞ්ඝෙ ලොකනායකෙ
සරණං තස්සු’පාගඤ්ජිං පබ්බජ්ජඤ්චා’භිරොචයි.

13. සො’පි මං බුද්ධො ව්යාකාසි කරොන්තො අනුමොදනං
තිංසකප්පසහස්සම්හි අයං බුද්ධො භවිස්සති.

14. අහු කපිලව්හයා රම්මා නික්ඛමිත්වා තථාගතො
පධානං පදහිත්වාන කත්වා දුක්කරකාරිකං.

15. අජපාලරුක්ඛමූලස්මිං නිසීදිත්වා තථාගතො
තත්ථපායාසමග්ගය්හ නෙරඤ්ජරමුපෙහිති.

16. නෙරඤ්ජරාය තීරම්හි පායාසං ආදාය සො ජිනො
පටියත්තවරමග්ගෙන බොධිමූලම්හි එහිති.

17. තතො පදක්ඛිණං කත්වා බොධිමණ්ඩං අනුත්තරො
අස්සත්ථරුක්ඛමූලම්හි බුජ්ඣිස්සති මහායසො.

18. ඉමස්ස ජනිකා මාතා මායා නාම භවිස්සති
පිතා සුද්ධොදනො නාම අයං හෙස්සති ගොතමො.

19. කොලිතො උපතිස්සො ච අග්ගා හෙස්සන්ති සාවකා
ආනන්දො නාමුපට්ඨාකො උපට්ඨිස්සති තං ජිනං.

20. ඛෙමා උප්පලවණ්ණා ච අග්ගා හෙස්සන්ති සාවකා
බොධි තස්ස භගවතො අස්සත්ථො’ති පවුච්චති.

21. චිත්තො ච හත්ථාළවකො අග්ගා හෙස්සන්තු’පට්ඨකා
උත්තරා නන්දමාතා ච අග්ගා හෙස්සන්තු’පට්ඨිකා
ආයු වස්සසතං තස්ස ගොතමස්ස යසස්සිනො.

22. ඉදං සුත්වාන වචනං අසමස්ස මහෙසිනො
ආමොදිතා නරමරූ බුද්ධබීජඞ්කුරො අයං.

23. උක්කුට්ඨිසද්දං වත්තෙන්ති අප්ඵොටෙන්ති හසන්තී ච
කතඤ්ජලී නමස්සන්ති දසසහස්සී සදෙවකා.