1160. නගරෙ අරුණවතියා අරුණො නාම ඛත්තියො
තස්ස රඤ්ඤො අහං භරියා එකජ්ඣං චාරයාමහං.

1161. රහොගතා නිසීදිත්වා එවං චින්තෙස’හං තදා
ආදාය ගමනීයං හි කුසලං නත්ථි මෙ කතං.

1162. මහාසිතාපං කටුකං ඝොරරූපං සුදාරුණං
නිරයං නූන ගච්ඡාමි එත්ථ මෙ නත්ථි සංසයො.

1163. එවාහං චින්තයිත්වාන පහංසෙත්වාන මානසං
රාජානං උපගන්ත්වාන ඉදං වචනමබ්රවිං.

1164. “ඉත්ථි නාම මයං දෙව පුරිසානුගතා සදා
එකං මෙ සමණං දෙහි භොජයිස්සාමි ඛත්තිය.”

1165. අදාසි මෙ තදා රාජා සමණං භාවිතින්ද්රියං
තස්ස පත්තං ගහෙත්වාන පරමන්නෙන පූරයිං.

1166. පූරෙත්වා පරමං අන්නං සහස්සග්ඝනකෙනහං
මහාචෙලෙන ඡාදෙත්වා අදාසිං තුට්ඨමානසා.

1167. තෙන කම්මෙන සුකතෙන චෙතනාපණිධීහි ච
ජහිත්වා මානුසං දෙහං තාවතිංසං අගච්ඡහං.

1168. සහස්සං දෙවරාජූනං මහෙසිත්තමකාරයිං.
සහස්සං චක්කවත්තීනං මහෙසිත්තමකාරයිං.

1169. පදෙසරජ්ජං විපුලං ගණනාතො අසඞ්ඛියං
නානාවිධං බහුං අඤ්ඤං තස්ස කම්මඵලං තතො.

1170. උප්පලස්සෙව මෙ වණ්ණො අභිරූපා සුදස්සනා
ඉත්ථි සබ්බඞ්ගසම්පන්නා අභිජාතා ජුතින්ධරා.

1171. පච්ඡිමභවෙ සම්පත්තෙ අජායිං සාකියෙ කුලෙ
නාරීසහස්සපාමොක්ඛා සුද්ධොදනසුතස්සහං.

1172. නිබ්බින්දිත්වා අගාරෙහං පබ්බජිං අනගාරියං
සත්තමිං රත්තිමප්පත්වා චතුසච්චමපාපුණිං.

1173. චීවරං පිණ්ඩපාතං ච පච්චයං සයනාසනං
පරිමෙතුං න සක්කොමි පිණ්ඩපාතස්සිදං ඵලං

1174. යං මය්හං පුරිමං කම්මං කුසලං සරසෙ මුනි
තුය්හත්ථාය මහාවීර පරිච්චත්තං බහුං මයා.

1175. එකතිංසෙ ඉතො කප්පෙ යං දානමදදිං තදා
දුග්ගතිං නාභිජානාමි පිණ්ඩපාතස්සිදං ඵලං.

1176. ද්වෙ ගතියො පජානාමි දෙවත්තං අථ මානුසං
අඤ්ඤං ගතිං න ජානාමි පිණ්ඩපාතස්සිදං ඵලං

1177. උච්චෙ කුලෙ පජායාමි මහාසාලෙ මහද්ධනෙ
අඤ්ඤෙ කුලෙ න ජානාමි පිණ්ඩපාතස්සිදං ඵලං.