1185. පදුමුත්තරො නාම ජිනො සබ්බධම්මානපාරගූ
ඉතො සතසහස්සම්හි කප්පෙ උපපජ්ජි නායකො.

1186. තදාහං හංසවතියං ජාතාමච්චකුලෙ අහුං
නානාරතනපජ්ජොතෙ ඉද්ධෙ ඵීතෙ මහද්ධනෙ.

1187. පිතුනා සහ ගන්ත්වාන මහාජනපුරක්ඛතා
ධම්මං බුද්ධස්ස සුත්වාන පබ්බජිං අනගාරියං.

1188. පබ්බජිත්වාන කායෙන පාපකම්මං විවජ්ජයිං
වචීදුච්චරිතං හිත්වා ආජීවං පරිසොධයිං.

1189. බුද්ධෙ පසන්නා ධම්මෙ ච සඞ්ඝෙ ච තිබ්බගාරවා
සද්ධම්මසවනෙ යුත්තා බුද්ධදස්සනලාලසා.

1190. අග්ගං සද්ධාධිමුත්තානං අස්සොසිං භික්ඛුනිං තදා
තං ඨානං පත්ථයිත්වාන තිස්සො සික්ඛා අපූරයිං,
තතො මං සුගතො ආහ කරුණානුගතාසයො.

1191. “යස්ස සද්ධා තථාගතෙ අචලා සුප්පතිට්ඨිතා
සීලං ච යස්ස කල්යාණං අරියකන්තං පසංසිතං.

1192. සඞ්ඝෙ පසාදො යස්සත්ථි උජුභූතං ච දස්සනං
අදළිද්දොති තං ආහු අමොඝං තස්ස ජීවිතං.

1193. තස්මා සද්ධං ච සීලං ච පසාදං ධම්මදස්සනං
අනුයුඤ්ජෙථ මෙධාවී සරං බුද්ධානසාසනං.”

1194. තං සුත්වා’හං පමුදිතා අපුච්ඡිං පණිධිං මම
තදා අනොමො අමිතො ව්යාකරිත්ථ විනායකො.

1195. බුද්ධෙ පසන්නා කල්යාණි ලච්ඡසෙ තං සුපත්ථිතං
සතසහස්සෙ ඉතො කප්පෙ ඔක්කාකකුලසම්භවො
ගොතමො නාම නාමෙන සත්ථා ලොකෙ භවිස්සති.

1196. තස්ස ධම්මෙසු දායාදා ඔරසා ධම්මනිම්මිතා
සිගාලකස්ස මාතා ති හෙස්සති සත්ථු සාවිකා.

1197. තං සුත්වා මුදිතා හුත්වා යාවජීවං තදා ජිනං
මෙත්තචිත්තා පරිචරිං පටිපත්තීහි නායකං.

1198. තෙන කම්මෙන සුකතෙන චෙතනාපණිධීහි ච
ජහිත්වා මානුසං දෙහං තාවතිංසං අගච්ඡහං.

1199. පච්ඡිමෙ ච භවෙ’දානි ගිරිබ්බජපුරුත්තමෙ.
ජාතා සෙට්ඨිකුලෙ ඵීතෙ මහාරතනසඤ්චයෙ.

1200. පුත්තො සිගාලකො නාම මමාසි විපථො රතො
දිට්ඨිගහනපක්ඛන්නො දිසාපූජනතප්පරො.

1201. නානාදිසා නමස්සන්තං පිණ්ඩාය නගරං වජං
තං දිස්වා ඔවදී බුද්ධො මග්ගෙ ඨත්වා විනායකො.

1202. තස්ස දෙසයතො ධම්මං නිනාදො විම්හයො අහු
දෙවකොටිනරනාරීනං ධම්මා’භිසමයො අහු.

1203. තදාහං පරිසං ගන්ත්වා සුත්වා සුගතභාසිතං
සොතාපත්තිඵලං පත්තා පබ්බජිං අනගාරියං.