1116. චුල්ලාසීතිසහස්සානි බ්රහ්මඤ්ඤකුලසම්හවා
සුඛුමාලහත්ථපාදා පුරෙ තුය්හං මහාමුනෙ.

1117. වෙස්සසුද්දකුලෙ ජාතා දෙවා නාගා ච කින්නරා
චාතුද්දීපා බහූ කඤ්ඤා පුරෙ තුය්හං මහාමුනෙ.

1118. කෙචි පබ්බජිතා අත්ථි සච්චදස්සාවිනො බහූ
දෙවා ච කින්නරා නාගා බුජ්ඣිස්සන්ති අනාගතෙ.

1119. අනුභොත්වා යසං සබ්බං පත්වාන සබ්බසම්පදා
ත්වයි පසාදං පටිලද්ධා බුජ්ඣිස්සන්ති අනාගතෙ.

1120. අම්හෙ බ්රාහ්මණධීතා තු බ්රහ්මඤ්ඤකුලසම්හවා
පෙක්ඛතො නො මහාවීර පාදෙ වන්දාම චක්ඛුම.

1121. උපහතා භවා සබ්බෙ මූලතණ්හා සමූහතා
සමුච්ඡින්නා අනුසයා පුඤ්ඤසඞ්ඛාරා දාලිතා.

1122. සමාධිගොචරා සබ්බා සමාපත්තිවසී තථා
ඣානෙන ධම්මරතියා විහරිස්සාම නො සදා

1123. භවනෙත්තී අවිජ්ජා ච සඞ්ඛාරා’පි ච ඛෙපිතා
සුදුද්දසං පදං ගන්තුං අනුජානාථ නායක.

1124. උපකාරා මමං තුම්හෙ දීඝරත්තං කතාවිනො
බහුන්නං සංසයං ඡෙත්වා සබ්බා ගච්ඡන්තු නිබ්බුතිං.

1125. වන්දිත්වා මුනිනො පාදෙ කත්වා ඉද්ධිවිකුබ්බණං.
කාචි දස්සෙන්ති ආලොකං අන්ධකාරමථාපරා.

1126. දස්සෙන්ති චන්දසුරියෙ සාගරං ච සමච්ඡකං
සිනෙරුපරිභණ්ඩං ච දස්සෙන්ති පාරිඡත්තකං.

1127. තාවතිංසං ච භවනං යාමං දස්සෙන්ති ඉද්ධියා
තුසිතං නිම්මිතෙ දෙවෙ වසවත්තී මහිස්සරෙ.

1128. බ්රහ්මානො කාචි දස්සෙන්ති චඞ්කමං ච මහාරහං
බ්රහ්මවණ්ණං ච මාපෙත්වා ධම්මං දෙසෙන්ති සුඤ්ඤතං.

1129. නානාවිකුබ්බණං කත්වා ඉද්ධිං දස්සිය සත්ථුනො
දස්සයිංසු බලං සබ්බා පාදෙ වන්දිංසු සත්ථුනො.

1130. ඉද්ධිසු ච වසී හොම දිබ්බාය සොතධාතුයා
චෙතොපරියඤාණස්ස වසී හොම මහාමුනෙ.

1131. පුබ්බෙනිවාසං ජානාම දිබ්බචක්ඛු විසොධිතං
සබ්බාසවා පරික්ඛීණා නත්ථිදානි පුනබ්භවො.

1132. අත්ථධම්මනිරුත්තීසු පටිභානෙ තථෙව ච
ඤාණං අම්හං මහාවීර උප්පන්නං තව සන්තිකෙ.

1133. පුබ්බානං ලොකනාථානං සඞ්ගමං නො නිදස්සිතං
අධිකාරා බහූ අම්හං තුය්හත්ථාය මහාමුනෙ.

1134. යං අම්හෙහි කතං කම්මං කුසලං සරතං මුනෙ
තුය්හත්ථාය මහාවීර පුඤ්ඤා’නුපචිතානි නො.

1135. සතසහස්සෙ ඉතො කප්පෙ පදුමුත්තරො මහාමුනි
පුරං හංසවතී නාම සම්බුද්ධස්ස කුලාසයං.

1136. ද්වාරෙන හංසවතියා ගඞ්ගා සන්දති සබ්බදා
උබ්බාළ්හා නදියා භික්ඛූ ගමනං න ලභන්ති තෙ.

1137. දිවසං ද්වෙ තයො චෙව සත්තාහං මාසකං තතො
චතුමාසම්පි සම්පුණ්ණං ගමනං න ලභන්ති තෙ.

1138. තදා අහු සත්තසාරො ජටිලො නාම රට්ඨිකො
ඔරුද්ධෙ භික්ඛවො දිස්වා සෙතුං ගඞ්ගාය කාරයී.

1139. තදා සතසහස්සෙහි සෙතුං ගඞ්ගාය කාරයී
සඞ්ඝස්ස ඔරිමෙ තීරෙ විහාරං ච අකාරයී.