882. පදුමුත්තරො නාම ජිනො සබ්බධම්මෙසු චක්ඛුමා
ඉතො සතසහස්සම්හි කප්පෙ උප්පජ්ජි නායකො.

883. තදා’හු හංසවතියං විදෙහො නාම නාමතො
සෙට්ඨි පහූතරතනො තස්ස ජායා අහොස’හං

884. කදාචි සො නරාදිච්චං උපෙච්ච සපරිජ්ජනො
ධම්මමස්සොසි බුද්ධස්ස සබ්බදුක්ඛක්ඛයාවහං.

885. සාවකං ධුතවාදානං අග්ගං කිත්තෙසි නායකො
සුත්වා සත්තාහිතං දානං දත්වා බුද්ධස්ස තාදිනො.

886. නිපච්ච සිරසා පාදෙ තං ඨානං අභිපත්ථයි
ස හාසයන්තො පරිසං තදා හි නරපුඞ්ගවො.

887. සෙට්ඨිනො අනුකම්පාය ඉමා ගාථා අභාසථ:
“ලච්ඡසෙ පත්ථිතං ඨානං නිබ්බුතො හොහි පුත්තක.

888. සතසහස්සෙ ඉතො කප්පෙ ඔක්කාකකුලසම්භවො
ගොතමො නාම ගොත්තෙන සත්ථා ලොකෙ භවිස්සති.

889. තස්ස ධම්මෙසු දායාදො ඔරසො ධම්මනිම්මිතො
කස්සපො නාම නාමෙන හෙස්සසි සත්ථුසාවකො.”

890. තං සුත්වා මුදිතො හුත්වා යාවජීවං තදා ජිනං
මෙත්තචිත්තො පරිචරි පච්චයෙහි විනායකං.

891. සාසනං ජොතයිත්වාන මද්දිත්වා ච කුතිත්ථියෙ
වෙනෙය්යෙ විනයිත්වා ච නිබ්බුතො සො සසාවකො.

892. නිබ්බුතෙ තම්හි ලොකග්ගෙ පූජනත්ථාය සත්ථුනො
ඤාතිමිත්තෙ සමානෙත්වා සහ තෙහි අකාරයි.

893. සත්තයොජනිකං ථූපං උබ්බිද්ධං රතනාමයං
ජලන්තං සතරංසීව සාලරාජංව ඵුල්ලිතං.

894. සත්තසතසහස්සානි පාතියො තත්ථ කාර’යි
නළග්ගි විය ජොතන්තී රතනෙහෙව සත්තහි.

895. ගන්ධතෙලෙන පූරෙත්වා දීපානුජාලයි තහිං
පූජත්ථාය මහෙසිස්ස සබ්බභූතානුකම්පිනො.

896. සන්ත සතසහස්සානි පුණ්ණකුම්භානි කාරයි
රතනෙහෙව පුණ්ණානි පූජත්ථාය මහෙසිනො.

897. මජ්ඣෙ අට්ඨට්ඨ කුම්හීනං උස්සිතා කඤ්චනග්ඝියා
අතිරොචන්ති වණ්ණෙන සරදෙව දිවාකරො.

898. චතුද්වාරෙසු සොභන්ති තොරණා රතනාමයා
උස්සිතා ඵලකා රම්මා සොභන්ති රතනාමයා.

899. විරොචන්ති පරික්ඛිත්තා අවතංසා සුනිම්මිතා
උස්සිතානි පටාකානි රතනානි විරොචරෙ.

900. සුරත්තං සුකතං චෙතං චෙතියං රතනාමයං
අතිරොචති වණ්ණෙන සසඤ්ඣොව දිවාකරො.