733. පදුමුත්තරො නාම ජිනො සබ්බධම්මානපාරගූ
ඉතො සතසහස්සම්හි කප්පෙ උප්පජ්ජි නායකො.

734. තදා’හං හංසවතියං කුලෙ අඤ්ඤතරෙ අහුං
පරකම්මකරී ආසිං නිපකා සීලසංවුතා.

735. පදුමුත්තර බුද්ධස්ස සුජාතො අග්ගසාවකො
විහාරා අභිනික්ඛම්ම පිණ්ඩපාතාය ගච්ඡති.

736. ඝටං ගහෙත්වා ගච්ඡන්තී තදා උදකහාරිකා
තං දිස්වා අදදිං පූවං පසන්නා සෙහි පාණිහි.

737. පටිග්ගහෙත්වා තත්ථෙව නිසින්නො පරිභුඤ්ජි සො
තතො නෙත්වාන තං ගෙහං අදාසිං තස්ස භොජනං.

738. තතො මෙ අය්යකො තුට්ඨො අකරී සුණිසං සකං
සස්සුයා සහ ගන්ත්වාන සම්බුද්ධං අභිවාදයිං.

739. තදා සො ධම්මකථිකං භික්ඛුනිං පරිකිත්තයං
ඨපෙසි එතදග්ගස්මිං තං සුත්වා මුදිතා අහං.

740. නිමන්තයිත්වා සුගතං සසඞ්ඝං ලොකනායකං
මහාදානං දදිත්වාන තං ඨානං අභිපත්ථයිං.

741. තතො මං සුගතො ආහ ඝනනින්නාදසුස්සරො
“මමූපට්ඨානනිරතෙ සසඞ්ඝං පරිවෙසිකෙ.

742. සද්ධම්මසවණෙ යුත්තෙ ගුණවඩ්ඪිතමානසෙ
භද්දෙ භවස්සු මුදිතා ලච්ඡසෙ පණිධීඵලං.

743. සතසහස්සෙ ඉතො කප්පෙ ඔක්කාකකුලසම්භවො
ගොතමො නාම ගොත්තෙන සත්ථා ලොකෙ භවිස්සති.

744. තස්ස ධම්මෙසු දායාදා ඔරසා ධම්මනිම්මිතා
ධම්මදින්නාති නාමෙන හෙස්සසි සත්ථුසාවිකා”.

745. තං සුත්වා මුදිතා හුත්වා යාවජීවං මහාමුනිං
මෙත්තචිත්තා පරිචරිං පච්චයෙහි විනායකං.

746. තෙන කම්මෙන සුකතෙන චෙතනාපණිධීහි ච
ජහිත්වා මානුසං දෙහං තාවතිංසං අගච්ඡහං.

747. ඉමස්මිං භද්දකෙ කප්පෙ බ්රහ්මබන්ධු මහායසො
කස්සපො නාම ගොත්තෙන උප්පජ්ජි වදතං වරො.

748. උපට්ඨාකො මහෙසිස්ස තදා ආසි නරිස්සරො
කාසිරාජා කිකී නාම බාරාණසිපුරුත්තමෙ.

749. ඡට්ඨා තස්සාසහං ධීතා සුධම්මා ඉති විස්සුතා
ධම්මං සුත්වා ජිනග්ගස්ස පබ්බජ්ජං සමරොචයිං.