769. පදුමුත්තරො නාම ජිනො සබ්බධම්මානපාරගූ
ඉතො සතසහස්සම්හි කප්පෙ උප්පජ්ජි නායකො.

770. හිතාය සබ්බසත්තානං සුඛාය වදතං වරො
අත්ථාය පුරිසාජඤ්ඤො පටිපන්නො සදෙවකෙ.

771. යසග්ගප්පත්තො සිරිමා වණ්ණකිත්තිභතො ජිනො
පූජිතො සබ්බලොකස්ස දිසා සබ්බාසු විස්සුතො.

772. උත්තිණ්ණවිචිකිච්ඡො සො වීතිවත්තකථංකථො
සම්පුණ්ණමනසඞ්කප්පො පත්තො සම්බොධිමුත්තමං.

773. අනුප්පන්නස්ස මග්ගස්ස උප්පාදෙතා නරුත්තමො.
අනක්ඛාතඤ්ච අක්ඛාසි අසඤ්ජාතඤ්ච සඤ්ජනී.

774. මග්ගඤ්ඤූ ච මග්ගවිදූ මග්ගක්ඛායී නරාසභො
මග්ගස්ස කුසලො සත්ථා සාරථීනං වරුත්තමො.

775. මහාකාරුණිකො සත්ථා ධම්මං දෙසෙසි නායකො
නිමුග්ගෙ කාමපඞ්කම්හි සමුද්ධරති පාණිනො.

776. තදා’හං හංසවතියං ජාතා ඛත්තියනන්දනා
සුරූපා සධනා චාසිං දයිතා ච සිරීමතී.

777. ආනන්දස්ස මහාරඤ්ඤො ධීතා පරමසොභනා
වෙමාතුභගිනී චාපි පදුමුත්තරනාමිනො.

778. රාජකඤ්ඤාහි සහිතා සබ්බාභරණභූසිතා
උපගම්ම මහාවීරං අස්සොසිං ධම්මදෙසනං.

779. තදා හි සො ලොකගරු භික්ඛුනිං දිබ්බචක්ඛුකං
කිත්තයං පරිසාමජ්ඣෙ අග්ගට්ඨානෙ ඨපෙසි තං.

780. සුණිත්වා තමහං හට්ඨා දානං දත්වාන සත්ථුනො
පූජෙත්වාන ච සම්බුද්ධං දිබ්බචක්ඛුං අපත්ථයිං.

781. තතො අවොච මං සත්ථා “නන්දෙ ලච්ඡසි පත්ථිතං
පදීපධම්මදානානං ඵලමෙතං සුනිච්ඡිතං.

782. සතසහස්සෙ ඉතො කප්පෙ ඔක්කාකකුලසම්භවො
ගොතමො නාම ගොත්තෙන සත්ථා ලොකෙ භවිස්සති.

783. තස්ස ධම්මෙසු දායාදා ඔරසා ධම්මනිම්මිතා
සකුලා නාම නාමෙන හෙස්සසි සත්ථුසාවිකා.”

784. තෙන කම්මෙන සුකතෙන චෙතනාපණිධීහි ච
ජහිත්වා මානුසං දෙහං තාවතිංසං අගච්ඡ’හං.

785. ඉමම්හි භද්දකෙ කප්පෙ බ්රහ්මබන්ධු මහායසො
කස්සපො නාම ගොත්තෙන උප්පජ්ජි වදතං වරො.

786. පරිබ්බාජකිනී ආසිං තදා’හං එකචාරිනි
භික්ඛාය විචරිත්වාන අලභිං තෙලමත්තකං.

787. තෙන දීපං පදීපෙත්වා උපට්ඨිං සබ්බසංවරිං
චෙතියං දිපදග්ගස්ස විප්පසන්නෙන චෙතසා.

788. තෙන කම්මෙන සුකතෙන චෙතනාපණිධීහි ච
ජහිත්වා මානුසං දෙහං තාවතිංසං අගච්ඡ’හං.