131. නගරෙ බන්ධුමතියා බන්ධුමා නාම ඛත්තියො,
දිවසෙ පුණ්ණමායං සො උපවසි උපොසථං.

132. අහං තෙන සමයෙන කුම්බදාසී අහුං තහිං,
දිස්වා සරාජිකං සෙනං එවාහං චින්තයිං තදා.

133. “රාජාපි රජ්ජං ඡඩ්ඩෙත්වා උපවසි උපොසථං,
සඵලං නූන තං කම්මං ජනකායො පමොදිතො.”

134. යොනිසො පච්චවෙක්ඛිත්වා දුග්ගච්චඤ්ච දළිද්දතං,
මානසං සංපහංසෙත්වා උපවසිං උපොසථං.

135. අහං උපොසථං කත්වා සම්මාසම්බුද්ධසාසනෙ,
තෙන කම්මෙන සුකතෙන තාවතිංසං අගච්ඡහං

136. තත්ථ මෙ සුකතං ව්යම්හං උද්ධං යොජනමුග්ගතං,
කූටාගාරවරූපෙතං සයනාසනභූසිතං.

137. අච්ඡරා සතසහස්සා උපතිට්ඨන්ති මං සදා,
අඤ්ඤෙ දෙවෙ අතික්කම්ම අතිරොචාමි සබ්බදා.

138. චතුසට්ඨිදෙවරාජූනං මහෙසිත්තමකාරයිං,
තෙසට්ඨිචක්කවත්තීනං මහෙසිත්තමකාරයිං.

139. සුවණ්ණවණ්ණා හුත්වාන භවෙසු සංසරාමහං,
සබ්බත්ථ පවරා හොමි උපොසථස්සිදං ඵලං.

140. හත්ථියානං අස්සයානං රථයානඤ්ච සිවිකං
ලභාමි සබ්බමෙතම්පි උපොසථස්සිදං ඵලං.

141. සොවණ්ණමයං රූපිමයං අථොපි ඵලිකාමයං,
ලොහිතඞ්කමයඤ්චෙව සබ්බං පටිලභාම’හං.

142. කොසෙය්යකම්බලියානි ඛොමකප්පාසිකානි ච,
මහග්ඝානි ච වත්ථානි සබ්බං පටිලභාම’හං.

143. අන්නං පානං ඛාදනීයං වත්ථසෙනාසනානි ච,
සබ්බමෙතං පටිලභෙ උපොසථස්සිදං ඵලං.

144. වරගන්ධඤ්ච මාලඤ්ච චුණ්ණකඤ්ච විලෙපනං,
සබ්බමෙතං පටිලභෙ උපොසථස්සිදං ඵලං.

145. කූටාගාරඤ්ච පාසාදං මණ්ඩපං හම්මියං ගුහං,
සබ්බමෙතං පටිලභෙ උපොසථස්සිදං ඵලං.

146. ජාතියා සත්තවස්සො’හං පබ්බජිං අනගාරියං,
අඩ්ඪමාසෙ අසම්පත්තෙ අරහත්තං අපාපුණිං,

147. කිලෙසා ඣාපිතා මය්හං භවා සබ්බෙ සමූහතා,
සබ්බාසවා පරික්ඛීණා නත්ථිදානි පුනබ්භවො.

148. එකනවුතෙ ඉතො කප්පෙ යං කම්මමකරිං තදා,
දුග්ගතිං නාභිජානාමි උපොසථස්සිදං ඵලං.

149. ස්වාගතං වත මෙ ආසි මම බුද්ධසෙට්ඨස්ස සන්තිකෙ,
තිස්සො විජ්ජා අනුප්පත්තා කතං බුද්ධස්ස සාසනං.

150. පටිසම්භිදා චතස්සො ච විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං