46. නගරෙ බන්ධුමතියා බන්ධුමා නාම ඛත්තියො
තස්ස රඤ්ඤො අහුං භරියා එකජ්ඣං චාරයාමහං

47. රහොගතා නිසීදිත්වා එවං චින්තෙස’හං තදා,
“ආදාය ගමනීයං හි කුසලං නත්ථි මෙ කතං.

48. මහාභිතාපං කටුකං ඝොරරූපං සුදාරුණං,
නිරයං නූන ගච්ඡාමි එත්ථ මෙ නත්ථි සංසයො.”

49. රාජානං උපසඞ්කම්ම ඉදං වචනමබ්රවිං,
“එකං මෙ සමණං දෙහි භොජයිස්සාමි ඛත්තිය.”

50. අදාසි මෙ මහාරාජා සමණං භාවිතින්ද්රියං,
තස්ස පත්තං ගහෙත්වාන පරමන්නෙන පූරයිං.

51. පූරයිත්වා පරමන්නං ගන්ධාලෙපමකාසහං,
සහස්සග්ඝනකෙනෙව වත්ථයුගෙන ඡාදයිං.

52. ආරම්මණං මම එතං සරාමි යාවජීවිතං,
තත්ථ චිත්තං පසාදෙත්වා තාවතිංසං අගච්ඡහං.

53. තිංසානං දෙවරාජූනං මහෙසිත්තමකාරයිං,
මනසා පත්ථිතං මය්හං නිබ්බත්තති යථිච්ඡිතං

54. වීසානං චක්කවත්තීනං මහෙසිත්තමකාරයිං,
ඔචිතත්තාව හුත්වාන සංසරාමි භවෙස්වහං.

55. සබ්බබන්ධනමුත්තාහං අපෙතා මෙ උපාදිකා,
සබ්බාසවා පරික්ඛීණා නත්ථිදානි පුනබ්භවො.

56. එකනවුතෙ ඉතො කප්පෙ - යං දානමදදිං තදා,
දුග්ගතිං නාභිජානාමි පිණ්ඩපාතස්සිදං ඵලං.

57-59 කිලෙසා ඣාපිතා -පෙ- කතං බුද්ධස්ස සාසනං.

60. පිණ්ඩචාරං චරන්තස්ස තිස්ස නාමස්ස සත්ථුනො,
කටච්ඡුභික්ඛං පග්ගය්හ බුද්ධසෙට්ඨස්ස’දාස’හං.

61. පටිග්ගහෙත්වා සම්බුද්ධො තිස්සො ලොකග්ගනායකො,
වීථියා සණ්ඨිතො සත්ථා අකා මෙ අනුමොදනං.

62. “කටච්ඡුභික්ඛං දත්වාන තාවතිංසං ගමිස්සසි,
ඡත්තිංසදෙවරාජූනං මහෙසිත්තං කරිස්සසි.

63. පඤ්ඤාස චක්කවත්තීනං මහෙසිත්තං කරිස්සසි,
මනසා පත්ථිතං සබ්බං පටිලච්ඡසි සබ්බදා.

64. සම්පත්තිං අනුභොත්වාන පබ්බජිස්සසි’කිඤ්චනා,
සබ්බාසවෙ පරිඤ්ඤාය නිබ්බායිස්සසි’නාසවා.”