1. භගවති කොණාගමනෙ සඞ්ඝාරාමම්හි නවනිවෙසම්හි
සඛියො තිස්සො ජනියො විහාරදානං අදාසිම්හ.

2. දසක්ඛත්තුං සතක්ඛත්තුං දසසතක්ඛත්තුං සතානං ච සතක්ඛත්තුං
දෙවෙසු උපපජ්ජිම්හ කො වාදො මානුසකෙ භවෙ.

3. දෙවෙ මහිද්ධිකා අහුම්හ මානුසකම්හි කො වාදො
සත්තරතනස්ස මහෙසී ඉත්ථිරතනං අහං ආසිං.

4. ඉධ සඤ්චිතකුසලා සුසමිද්ධකුලප්පජා
ධනඤ්ජානී ච ඛෙමා ච අහම්පි ච තයො ජනා.

5. ආරාමං සුකතං කත්වා සබ්බාවයවමණ්ඩිතං
බුද්ධප්පමුඛසඞ්ඝස්ස නිය්යාදෙත්වා පමොදිතා.

6. යත්ථ යත්ථූපපජ්ජාමි තස්ස කම්මස්ස වාහසා
දෙවෙසු අග්ගතං පත්තා මනුස්සෙසු තථෙව ච.

7. ඉමස්මිංයෙව කප්පම්හි බ්රහ්මබන්ධු මහායසො
කස්සපො නාම ගොත්තෙන උප්පජ්ජි වදතං වරො.

8. උපට්ඨාකො මහෙසිස්ස තදා ආසි නරිස්සරො
කාසිරාජා කිකී නාම බාරාණසිපුරුත්තමෙ.

9. තස්සාසුං සත්ත ධීතරො රාජඤ්ඤා සුඛෙධිතා
බුද්ධුපට්ඨානනිරතා බ්රහ්මචරියං චරිංසු තා.

10. තාසං සහායිකා හුත්වා සීලෙසු සුසමාහිතා
දත්වා දානානි සක්කච්චං අගාරෙව වතං චරිං.

11. තෙන කම්මෙන සුකතෙන චෙතනාපණිධීහි ච
ජහිත්වා මානුසං දෙහං තාවතිංසූපගා අහං.

12. තතො චුතා යාමමගං තතො’හං තුසිතං ගතා
තතො ච නිම්මාණරතිං වසවත්තිපුරං තතො.

13. යත්ථ යත්ථූපපජ්ජාමි පුඤ්ඤකමමසමොහිතා
තත්ථ තත්ථෙව රාජූනං මහෙසිත්තමකාරයිං.

14. තතො චුතා මනුස්සත්තෙ රාජූනං චක්කවත්තිනං.
මණ්ඩලීනඤ්ච රාජූනං මහෙසිත්තමකාරයිං.

15. සම්පත්තිමනුභොත්වාන දෙවෙසු මානුසෙසු ච
සබ්බත්ථ සුඛිතා හුත්වා නෙකජාතිසු සංසරිං.

16. සො හෙතු ච සො පභවො තං මූලං සා ච සාසනෙ ඛන්ති
තං පඨමං සමොධානං තං ධම්මරතාය නිබ්බානං.

17. කිලෙසා ඣාපිතා මය්හං භවා සබ්බෙ සමූහතා,
නාගීව බන්ධනං ඡෙත්වා විහරාමි අනාසවා.

18. ස්වාගතං වත මෙ ආසි බුද්ධසෙට්ඨස්ස සන්තිකෙ,
තිස්සො විජ්ජා අනුප්පත්තා කතං බුද්ධස්ස සාසනං.

19. පටිසම්භිදා චතස්සො ච විමොක්ඛාපි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.