20. සිද්ධත්ථස්ස භගවතො ථූපං කාරාපිකා අහුං,
මෙඛලිකා මයා දින්නා නවකම්මාය සත්ථුනො.

21. නිට්ඨිතෙ ච මහාථූපෙ මෙඛලං පුන’දාසහං,
ලොකනාථස්ස මුනිනො පසන්නා සෙහි පාණිහි.

22. චතුනවුතෙ ඉතො කප්පෙ යං මෙඛලමදං තදා,
දුග්ගතිං නාභාජානාමි ථූපකාරස්සිදං ඵලං.

23. කිලෙසා ඣාපිතා මය්හං -පෙ- විහරාමි අනාසවා.

24. ස්වාගතං වත මෙ ආසි -පෙ- කතං බුද්ධස්ස සාසනං.

25. පටිසම්භිදා චතස්සො ච -පෙ- කතං බුද්ධස්ස සාසනං.

26. කොණාගමනස්ස මුනිනො මණ්ඩපො කාරිතො මයා
ධුවං ච චීවරමදං බුද්ධස්ස ලොකබන්ධුනො.

27. යං යං ජනපදං යාමි නිගමෙ රාජධානියො
සබ්බත්ථ පූජිතා හොමි පුඤ්ඤකම්මස්සිදං ඵලං.

28. කිලෙසා ඣාපිතා මය්හං -පෙ- විහරාමි අනාසවා.

29. ස්වාගතං වත මෙ ආසි -පෙ- කතං බුද්ධස්ස සාසනං.

30. පටිසම්භිදා චතස්සො ච -පෙ- කතං බුද්ධස්ස සාසනං.

31. විපස්සිස්ස භගවතො ලොකජෙට්ඨස්ස තාදිනො,
රථියං පටිපන්නස්ස කාරයන්තස්ස පාණිනො.

32. ඝරතො නික්ඛමිත්වාන අවක්කුජ්ජා නිප්පජ්ජ’හං
අනුකම්පකො ලොකනාථො සීසන්තෙ අක්කමී මම

33. අක්කමිත්වාන සිරසි අගමා ලොකනායකො
තෙන චිත්තප්පසාදෙන තුසිතං උපපජ්ජහං

34. කිලෙසා ඣාපිතා මය්හං -පෙ- විහරාමි අනාසවා.

35. ස්වාගතං වත මෙ ආසි -පෙ- කතං බුද්ධස්ස සාසනං.

36. පටිසම්භිදා චතස්සො ච -පෙ- කතං බුද්ධස්ස සාසනං.

37. චන්දභාගානදීතීරෙ අහොසිං කින්නරී තදා,
අද්දසං විරජං බුද්ධං සයම්භුං අපරාජිතං.

38. පසන්නචිත්තා සුමනා වෙදජාතා කතඤ්ජලී,
නළමාලං ගහෙත්වාන සයම්භුං අභිපූජයිං.

39. තෙන කම්මෙන සුකතෙන චෙතනාපණිධීහි ච,
ජහිත්වා කින්නරීදෙහං අගච්ඡිං තිදසං ගතිං.

40. ඡත්තිංසදෙවරාජූනං මහෙසිත්තමකාරයිං,
දසන්නං චක්කවත්තීනං මහෙසිත්තමකාරයිං,
සංවෙජෙත්වාන මෙ චිත්තං පබ්බජිං අනගාරියං.