1512. රුක්ඛමූලෙ නිසින්නො’හං ව්යාධිතො පරමෙන ච,
පරමකාරුඤ්ඤපත්තො’ම්හි අරඤ්ඤෙ කානනෙ අහං.

1513. අනුකම්පං උපාදායං තිස්සො සත්ථා උපෙසි මං,
සො’හං නිපන්නකො සන්තො සිරෙ කත්වාන අඤ්ජලිං.

1514. පසන්නචිත්තො සුමනො සබ්බසත්තානමුත්තමං,
සම්බුද්ධං අභිවාදෙත්වා තත්ථ කාලකතො අහං.

1515. ද්වෙනවුතෙ ඉතො කප්පෙ යං වන්දිං පුරිසුත්තමං,
දුග්ගතිං නාභිජානාමි වන්දනාය ඉදං ඵලං.

1516. ඉතො පඤ්චමකෙ කප්පෙ පඤ්චෙවාසුං මහාසිඛා,
සත්තරතනසම්පන්නා චක්කවත්තී මහබ්බලා.

1517. පටිසම්භිදා -පෙ- කතං බුද්ධස්ස සාසනං.

1518. අභිභූ නාම සො භික්ඛු සිඛිනො අග්ගසාවකො,
මහානුභාවො තෙවිජ්ජො හිමවන්තං උපාගමී.

1519. අහම්පි හිමවන්තම්හි රමනීයස්සමෙ ඉසි,
වසාමි අප්පමඤ්ඤාසු ඉද්ධිසු ච තදා වසී.

1520. පක්ඛජාතො වියාකාසෙ පබ්බතං අධිවත්තයිං,
අධොපුප්ඵං ගහෙත්වාන ආගච්ඡිං පබ්බතං අහං.

1521. සත්ත පුප්ඵානි ගණ්හිත්වා මත්ථකෙ ඔකිරිං අහං,
ආලොකිතෙ ච වීරෙන පක්කාමිං පාචිනාමුඛො.

1522. ආවාසං අභිසම්භොසිං පත්වාන අස්සමං අහං,
ඛාරිභාරං ගහෙත්වාන පාවිසිං පබ්බතන්තරං.

1523. අජගරො මං පීළෙසි ඝොරරූපො මහබ්බලො,
පුබ්බකම්මං සරිත්වාන කත්ථ කාලකතො අහං.

1524. එකතිංසෙ ඉතො කප්පෙ යං පුප්ඵමභිරොපයිං,
දුග්ගතිං නාභිජානාමි පුප්ඵපූජායිදං ඵලං.

1525. පටිසම්භිදා -පෙ- කතං බුද්ධස්ස සාසනං.