1518. අභිභූ නාම සො භික්ඛු සිඛිනො අග්ගසාවකො,
මහානුභාවො තෙවිජ්ජො හිමවන්තං උපාගමී.

1519. අහම්පි හිමවන්තම්හි රමනීයස්සමෙ ඉසි,
වසාමි අප්පමඤ්ඤාසු ඉද්ධිසු ච තදා වසී.

1520. පක්ඛජාතො වියාකාසෙ පබ්බතං අධිවත්තයිං,
අධොපුප්ඵං ගහෙත්වාන ආගච්ඡිං පබ්බතං අහං.

1521. සත්ත පුප්ඵානි ගණ්හිත්වා මත්ථකෙ ඔකිරිං අහං,
ආලොකිතෙ ච වීරෙන පක්කාමිං පාචිනාමුඛො.

1522. ආවාසං අභිසම්භොසිං පත්වාන අස්සමං අහං,
ඛාරිභාරං ගහෙත්වාන පාවිසිං පබ්බතන්තරං.

1523. අජගරො මං පීළෙසි ඝොරරූපො මහබ්බලො,
පුබ්බකම්මං සරිත්වාන කත්ථ කාලකතො අහං.

1524. එකතිංසෙ ඉතො කප්පෙ යං පුප්ඵමභිරොපයිං,
දුග්ගතිං නාභිජානාමි පුප්ඵපූජායිදං ඵලං.

1525. පටිසම්භිදා -පෙ- කතං බුද්ධස්ස සාසනං.

1526. පබ්බතෙ හිමවන්තම්භි වාසං කප්පෙසහං පුරෙ,
අජිනුත්තරවාසො’හං වසාමි පබ්බතන්තරෙ.

1527. සුවණ්ණවණ්ණං සම්බුද්ධං සතරංසිංව භානුමං,
වනන්තරගතං දිස්වා සාලරාජං’ව පුප්ඵිතං.

1528. රංස්යා චිත්තං පසාදෙත්වා විපස්සිස්ස මහෙසිනො,
පග්ගය්හ අඤ්ජලිං වන්දිං සිරසා උක්කුටී අහං.

1529. එකනවුතෙ ඉතො කප්පෙ යං කම්මමකරිං තදා,
දුග්ගතිං නාභිජානාමි රංසිසඤ්ඤායිදං ඵලං.

1530. පටිසම්භිදා -පෙ- කතං බුද්ධස්ස සාසනං.

1531. පබ්බතෙ හිමවන්තම්භි වාකචීරධරො අහං,
චඞ්කමඤ්ච සමාරූළ්හො නිසීදිං පාචිනාමුඛො.

1532. පබ්බතෙ සුගතං දිස්වා ඵුස්සං ඣානරතං තදා,
අඤ්ජලිං පග්ගහෙත්වාන රංස්යා චිත්තං පසාදයිං.

1533. ද්වෙනවුතෙ ඉතො කප්පෙ යං සඤ්ඤමලභිං තදා,
දුග්ගතිං නාභිජානාමි රංසිසඤ්ඤායිදං ඵලං.

1534. පටිසම්භිදා -පෙ- කතං බුද්ධස්ස සාසනං.

1535. පබ්බතෙ හිමවන්තම්භි ඛුරාජිනධරො අහං,
ඵුස්සං ජිනවරං දිස්වා ඵලහත්ථො ඵලං අදං.

1536. යමහං ඵලමදාසිං විප්පසන්නෙන චෙතසා,
භවෙ නිබ්බත්තමානම්හි ඵලං නිබ්බත්තතෙ මම.

1537. ද්වෙනවුතෙ ඉතො කප්පෙ යං ඵලං අදදිං අහං,
දුග්ගතිං නාභිජානාමි ඵලදානස්සිදං ඵලං.

1538. පටිසම්භිදා -පෙ- කතං බුද්ධස්ස සාසනං.