1444. හිමවන්තස්ස අවිදූරෙ මහාජාතස්සරො අහු,
සතපත්තෙහි සඤ්ඡන්නො නානාසකුණමාලයො.

1445. තම්හි නහාත්වා පීත්වා ච අවිදූරෙ වසාමහං,
අද්දසං සමණානග්ගං ගච්ඡන්තං අනිලඤ්ජසෙ.

1446. මම සඞ්කප්පමඤ්ඤාය සත්ථා ලොකෙ අනුත්තරො,
ව්යම්හතො ඔරුහිත්වාන භූමියට්ඨාසි තාවදෙ.

1447. විසාණෙන තිණං ගය්හ නිසීදනමදාසහං,
නිසීදි භගවා තත්ථ තිස්සො ලොකග්ගනායකො.

1448. සකං චිත්තං පසාදෙත්වා අවන්දිං ලොකනායකං,
පතිකුටිකො අපසක්කිං නිජ්ඣායන්තො මහාමුනිං.

1449. තෙන චිත්තප්පසාදෙන නිම්මාණං උප්පජ්ජහං,
දුග්ගතිං නාභිජානාමි සන්ථරස්ස ඉදං ඵලං.

1450. ඉතො දුතියකෙ කප්පෙ මිගසම්මතඛත්තියො,
සත්තරතනසම්පන්නො චක්කවත්තී මහබ්බලො.

1451. පටිසම්භිදා -පෙ- කතං බුද්ධස්ස සාසනං.

1452. තිංසකප්පසහස්සම්හි සම්බුද්ධො ලොකනායකො,
සුමෙධො නාම නාමෙන බත්තිංසවරලක්ඛණො.

1453. තස්ස කඤ්චනවණ්ණස්ස දිපදින්දස්ස තාදිනො,
පඤ්ච සූචී මයා දින්නා සිබ්බනත්ථාය චීවරං.

1454. තෙනෙ’ව සූචිදානෙන නිපුණත්ථවිපස්සකං,
තික්ඛං ලහුඤ්ච ඵාසුඤ්ච ඤාණං මෙ උදපජ්ජථ.

1455. දිපදාධිපතී නාම රාජානො චතුරො අහුං,
සත්තරතනසම්පන්නා චක්කවත්තී මහබ්බලා.

1456. කිලෙසා ඣාපිතා මය්හං භවා සබ්බෙ සමූහතා,
ධාරෙමි අන්තිමං දෙහං සම්මාසම්බුද්ධසාසනෙ.

1457. පටිසම්භිදා -පෙ- කතං බුද්ධස්ස සාසනං.

1458. සෙට්ඨිපුත්තො තදා ආසිං සුඛුමාලො සුඛෙධිතො
උච්ඡඞ්ගෙ පාටලීපුප්ඵං කත්වා තං අභිසංහරිං.

1459. සුවණ්ණවණ්ණං සම්බුද්ධං ගච්ඡන්තං අන්තරාපණෙ,
කඤ්චනග්ඝියසඞ්කාසං ද්වත්තිංස වරලක්ඛණං.

1460. හට්ඨො හට්ඨෙන චිත්තෙන පුප්ඵෙන අභිපූජයිං,
තිස්සං ලොකවිදුං නාථං නරදෙවං නමස්සහං.

1461. ද්වෙනවුතෙ ඉතො කප්පෙ යං කම්මමකරිං තදා,
දුග්ගතිං නාභිජානාමි පුප්ඵපූජායිදං ඵලං.

1462. ඉතො තෙසට්ඨිකප්පම්හි අභිසම්මතනාමකො,
සත්තරතනසම්පන්නො චක්කවත්තී මහබ්බලො.

1463. පටිසම්භිදා -පෙ- කතං බුද්ධස්ස සාසනං.

1464. මිගලුද්දො පුරෙ ආසිං අරඤ්ඤෙ කානනෙ අහං,
තත්ථද්දසාසිං සම්බුද්ධං තිස්සං පවරලක්ඛණං.

1465. තස්සාහං අඤ්ජලිං කත්වා පක්කාමිං පාචිනාමුඛො,
අවිදූරෙ නිසින්නස්ස නියකෙ පණ්ණසන්ථරෙ.

1466. තතො මෙ අසනීපාතො මත්ථකෙ නිපතී තදා,
සො’හං මරණකාලම්හි අකාසිං පුනරඤ්ජලිං.