1384. ගිරිදුග්ගචරො ආසිං අභිජාතොව කෙසරී,
මිගසංඝං වධිත්වාන ජීවාමි පබ්බතන්තරෙ.

1385. අත්ථදස්සී තු භගවා සබ්බඤ්ඤූ වදතං වරො,
මමුද්ධරිතුකාමො සො ආගච්ඡි පබ්බතුත්තමං.

1386. පසදඤ්ච මිගං හන්ත්වා භක්ඛිතුං සමුපාගමිං,
භගවා තම්හි සමයෙ භික්ඛමානො උපාගමි.

1387. වරමංසානි පග්ගය්හ අදාසිං තස්ස සත්ථුනො,
අනුමොදි මහාවීරො නිබ්බාපෙන්තො මමං තදා.

1388. තෙන චිත්තප්පසාදෙන ගිරිදුග්ගං පවීසහං,
පීතිං උප්පාදයිත්වාන තත්ථ කාලකතො අහං.

1389. එතෙන මංසදානෙන චිත්තස්ස පණිධීහි ච,
පණ්ණරසෙ කප්පසතෙ දෙවලොකෙ රමිං අහං.

1390. අවසෙසෙසු කප්පෙසු කුසලං නිචිතං මයා,
තෙනෙව මංසදානෙන බුද්ධානුස්සරණෙන ච.

1391. අට්ඨතිංසම්හි කප්පම්හි අට්ඨ දීඝායුනාමකා,
සට්ඨිම්හි’තො කප්පසතෙ දුවෙ වරුණනාමකා.

1392 පටිසම්භිදා -පෙ- කතං බුද්ධස්ස සාසනං.

1393. පක්ඛිජාතො තදා ආසිං සුවණ්ණො ගරුළාධිපො,
අද්දසං විරජං බුද්ධං ගච්ඡන්තං ගන්ධමාදනං.

1394. ජහිත්වා ගරුළං වණ්ණං මාණවකං අධාරයිං,
එකං වත්ථං මයා දින්නං දිපදින්දස්ස තාදිනො.

1395. තඤ්ච දුස්සං පටිග්ගය්හ බුද්ධො ලොකග්ගනායකො,
අන්තළික්ඛෙ ඨිතො සත්ථා ඉමං ගාථං අභාසථ:

1396. “ඉමිනා වත්ථදානෙන චිත්තස්ස පණිධීහි ච,
පහාය ගරුළං යොනිං දෙවලොකෙ රමිස්සති.”

1397. අත්ථදස්සී තු භගවා ලොකජෙට්ඨො නරාසභො,
වත්ථදානං පසංසිත්වා පක්කාමි උත්තරාමුඛො.

1398. භවෙ තිබ්බත්තමානම්හි හොන්ති මෙ වත්ථසම්පදා,
ආකාසෙ ඡදනං හොති වත්ථදානස්සිදං ඵලං.

1399. අරුණකා සත්ත ජනා චක්කවත්තී මහබ්බලා,
ඡත්තිංසතිම්හි කප්පම්හි ආසිංසු මනුජාධිපා.

1400 පටිසම්භිදා -පෙ- කතං බුද්ධස්ස සාසනං.

1401. අනොමදස්සී භගවා නිසින්නො පබ්බතන්තරෙ,
මෙත්තාය අඵරී ලොකං අප්පමාණං නිරූපධි.

1402. කපි අහං තදා ආසිං හිමවන්තෙ නගුත්තමෙ,
දිස්වා අනොමං අමිතං බුද්ධෙ චිත්තං පසාදයිං.

1403. හිමවතන්තස්ස අවිදූරෙ අම්බාසුං ඵලිනො තදා,
තතො පක්කං ගහෙත්වාන අම්බං සමධුකං අදං.

1404. තම්මෙ බුද්ධො වියාකාසි අනොමදස්සී මහාමුනි,
“ඉමිනා මධුදානෙන අම්බදානෙන චූභයං.

1405. සත්තපඤ්ඤාස කප්පානි දෙවලොකෙ රමිස්සති,
අවසෙසෙසු කප්පෙසු වොකිණ්ණං සංසරිස්සති.

1406. ඛෙපෙත්වා පාපකං කම්මං පරිපක්කාය බුද්ධියා,
විනිපාතමගන්ත්වාන කිලෙසෙ ඣාපයිස්සති.”

1407. දමෙන උත්තමෙනාහං දමිතො’මබි මහෙසිනා,
පත්තො’ම්භි අචලං ඨානං හිත්වා ජයපරාජයං.