1300. පදුමුත්තරබුද්ධස්ස පිණ්ඩපාතං අදාසහං,
ගන්ත්වා තං භොජනට්ඨානං මල්ලිකාහි පරික්ඛිපිං.

1301. තම්හාසනම්භි ආසීනො බුද්ධො ලොකග්ගනායකො,
අකිත්තයී පිණ්ඩපාතං උජුභූතො සමාහිතො:

1302. “යථාපි භද්දකෙ ඛෙත්තෙ බීජං අප්පම්පි රොපිතං,
සම්මා ධාරං පවෙච්ඡන්තෙ ඵලං තොසෙති කස්සකං.

1303. තථෙවායං පිණ්ඩපාතො සුඛෙත්තෙ රොපිතො තයා,
භවෙ නිබ්බත්තමානං හි ඵලතො තොසයිස්සති”

1304. ඉදං වත්වාන සම්බුද්ධො ජලජුත්තරනාමකො,
පිණ්ඩපාතං ථවිත්වාන පක්කාමි උත්තරාමුඛො.

1305. සංවුතො පාතිමොක්ඛස්මිං ඉන්ද්රියෙසු ච පඤ්චසු,
පවිවෙකමනුයුත්තො විහරාමි අනාසවො.

1306 පටිසම්භිදා -පෙ- කතං බුද්ධස්ස සාසනං.

1307. පදුමුත්තරබුද්ධස්ස සබ්බභූතානුකම්පිනො,
සුසණ්ඨහිත්වා සද්ධම්මෙ උජුදිට්ඨි අහොසහං.

1308. පදීපදානං පාදාසිං පරිවාරෙත්වාන බොධියං,
සද්දහන්තො පදීපානි අකරිං තාවදෙ අහං.

1309. යං යං යොනුපපජ්ජාමි දෙවත්තං අථ මානුසං,
ආකාසෙ උක්කං ධාරෙන්ති දීපදානස්සිදං ඵලං.

1310. තිරොකුඩ්ඩං තිරොසෙලං සමතිග්ගය්හ පබ්බතං,
සමන්තා යොජනසතං දස්සනං අනුභොමහං.

1311. චතුත්තිංසෙ කප්පසතෙ සතචක්ඛුසනාමකා,
රාජා’හෙසුං මහාතෙජා චක්කවත්තී මහබ්බලා.

1312. තෙන කම්මාවසෙසෙන පත්තො’ම්භි ආසවක්ඛයං,
ධාරෙමි අන්තිමං දෙහං දිපදින්දස්ස සාසනෙ.

1313 පටිසම්භිදා -පෙ- කතං බුද්ධස්ස සාසනං.

1314. පදුමුත්තරබුද්ධස්ස බොධිම්හි පාදපුත්තමෙ,
හට්ඨො හට්ඨෙන චිත්තෙන ධජමාරොපයිං අහං.

1315. පතිතපත්තානි ගණ්හිත්වා බහිද්ධා ඡඩ්ඩයිං අහං,
අන්තොසුද්ධං බහිසුද්ධං අධිමුත්තමනාසවං,
සම්මුඛා විය සම්බුද්ධං අවන්දිං බොධිමුත්තමං.

1316. පදුමුත්තරො ලොකවිදූ ආහුතීනං පටිග්ගහො,
භික්ඛුසංඝෙ ඨිතො සත්ථා ඉමා ගාථා අභාසථ: