6331. මහාසමුද්දං ඔගය්හ භවනං මෙ සුනිම්මිතං,
සුනිම්මිතා පොක්ඛරණී චක්කවාකූපකූජිතා.

6332. මන්දාලකෙහි සඤ්ඡන්නා පදුමුප්පලකෙහි ච,
නදී ච සන්දතෙ තත්ථ සුපතිත්ථා මනොරමා.

6333. මච්ඡකච්ඡපසඤ්ඡන්නා නානාදිජසමාකුලා,
මයූරකොඤ්චාභිරුදා කොකිලාදිභි වග්ගුහි.

6334. පාරෙවතා රවිහංසා චක්කවාකා නදීචරා,
දින්දිභා සාළිකා චෙත්ථ පම්පකා ජීවංජීවකා.

6335. හංසා කොඤ්චාභිනදිතා කොසියා පිඞ්ගලා බහූ,
සත්තරතනසම්පන්නා මණිමුත්තිකවාලිකා.

6336. සබ්බෙ සොණ්ණමයා රුක්ඛා නානාගන්ධසමෙරිතා,
උජ්ජොතෙන්ති දිවාරත්තිං භවනං සබ්බකාලිකං.

6337. සට්ඨිතුරියසහස්සානි සායං පාතො පවජ්ජරෙ,
සොළසිත්ථිසහස්සානි පරිවාරෙන්ති මං සදා.

6338. අභිනික්ඛම්ම භවනා සුමෙධං ලොකනායකං,
පසන්නචිත්තො සුමනො වන්දයිං තං මහායසං.

6339. සම්බුද්ධං අභිවාදෙත්වා සසඞ්ඝං තං නිමන්තයිං,
අධිවාසෙසි සො ධීරො සුමෙධො ලොකනායකො.

6340. මම ධම්මකථං කත්වා උය්යොජෙසි මහාමුනි,
සම්බුද්ධං අභිවාදෙත්වා භවනං මෙ උපාගමිං.

6341. ආමන්තයිං පරිජනං සබ්බෙ සන්නිපතුං තදා,
පුබ්බන්හසමයං බුද්ධො භවනං ආගමිස්සති.

6342. ලාභා අම්හං සුලද්ධා නො යෙ වසාම තවන්තිකෙ,
මයම්පි බුද්ධසෙට්ඨස්ස පූජයිස්සාම සත්ථුනො.

6343. අන්නං පානං පට්ඨපෙත්වා කාලං ආරොචයිං අහං,
වසීසතසහස්සෙහි උපෙසි ලොකනායකො.

6344. පඤ්චඞ්ගිකෙහි තුරියෙහි පච්චුග්ගමමකාසහං,
සබ්බසොණ්ණමයෙ පීඨෙ නිසීදි පුරිසුත්තමො.

6345. උපරිච්ඡදනං ආසි සබ්බසොණ්ණමයං තදා,
වීජනියො පවායන්ති භික්ඛුසඞ්ඝං අනුත්තරං.

6346. පහූතෙනන්නපානෙන භික්ඛුසඞ්ඝං අතප්පයිං,
පච්චෙකදුස්සයුගලෙ භික්ඛුසඞ්ඝස්සදාහං.

6347. යං වදන්ති සුමෙධොති ආහුතීනං පටිග්ගහො,
භික්ඛු සඞ්ඝෙ නිසීදිත්වා ඉමා ගාථා අභාසථ:

6348. “යො මෙ අන්නෙන පානෙන සබ්බෙ ඉමෙ ච තප්පයි,
තමහං කිත්තයිස්සාමි සුණාථ මම භාසතො:

6349. අට්ඨාරසෙ කප්පසතෙ දෙවලොකෙ රමිස්සති,
සහස්සක්ඛත්තුං රාජායං චක්කවත්තී භවිස්සති.

6350. උපගච්ඡති යං යොනිං දෙවත්තං අථමානුසං,
සබ්බසොණ්ණමයං තස්ස ඡදනං ධාරයිස්සති.

6351. තිංසකප්පසහස්සම්හි ඔක්කාකකුලසම්භවො,
ගොතමො නාම නාමෙන සත්ථා ලොකෙ භවිස්සති.

6352. තස්ස ධම්මෙසු දායාදො ඔරසො ධම්මනිම්මිතො,
සබ්බාසවෙ පරිඤ්ඤාය නිබ්බායිස්සතනාසවො.

6353. භික්ඛු සඞ්ඝෙ නිසීදිත්වා සීහනාදං නදිස්සති,
චිතකෙ ඡත්තං ධාරෙන්ති හෙට්ඨා ඡත්තම්හි ඩය්හථ.”

6354. සාමඤ්ඤං මෙ අනුප්පත්තං කිලෙසා ඣාපිතා මයා,
මණ්ඩපෙ රුක්ඛමූලෙ වා සන්තාසො මෙ න විජ්ජති.

6355. තිංස කප්පසහස්සම්හි යං දානමදදිං තදා,
දුග්ගතිං නාභාජානාමි සබ්බදානස්සිදං ඵලං.

6356. කිලෙසා ඣාපිතා මය්හං භවා සබ්බෙ සමූහතා,
නාගො’ව බන්ධනං ඡෙත්වා විහරාමි අනාසවො.

6357. ස්වාගතං වත මෙ ආසි බුද්ධසෙට්ඨස්ස සන්තිකෙ,
තිස්සො විජ්ජා අනුප්පත්තා කතං බුද්ධස්ස සාසනං.

6358. පටිසම්භිදා චතස්සො ච විමොක්ඛා පි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.