6359. පදුමුත්තරස්ස භගවතො ලොකජෙට්ඨස්ස තාදිනො
පිණ්ඩචාරං චරන්තස්ස වාරතො උත්තමං යසං,
අග්ගඵලං ගහෙත්වාන අදාසිං සත්ථුනො අහං.

6360. තෙන කම්මෙන දෙවින්දො ලොකජෙට්ඨො නරාසභො,
සම්පත්තොම්හි අචලං ඨානං හිත්වා ජයපරාජයං.

6361. සතසහස්සිතො කප්පෙ යං ඵලං අදදිං තදා,
දුග්ගතිං නාභිජානාමි අග්ගදානස්සිදං ඵලං.

6362. කිලෙසා ඣාපිතා මය්හං භවා සබ්බෙ සමූහතා,
නාගොව බන්ධනං ඡෙත්වා විහරාමි අනාසවො.

6363. ස්වාගතං වත මෙ ආසි බුද්ධසෙට්ඨස්ස සන්තිකෙ,
තිස්සො විජ්ජා අනුප්පත්තා කතං බුද්ධස්ස සාසනං.

6364. පටිසම්භිදා චතස්සො ච විමොක්ඛා පි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

6365. අජිනචම්මවත්ථොහං ඛාරිභාරධරො තදා,
ඛාරිකං හාරයිත්වාන කොලං අහාසිමස්සමං.

6366. භගවා තස්මිං සමයෙ එකො අදුතියො ජිනො,
මමස්සමං උපාගඤ්ජි ජොතෙන්තො සබ්බකාලිකං.

6367. සකං චිත්තං පසාදෙත්වා අභිවාදෙත්වාන සුබ්බතං,
උභොහත්ථෙහි පග්ගය්හ කොලං බුද්ධස්ස’දාස’හං.

6368. එකතිංසෙ ඉතො කප්පෙ යං ඵලං අදදිං තදා,
දුග්ගතිං නාභිජානාමි කොලදානස්සිදං ඵලං.

6369. කිලෙසා ඣාපිතා මය්හං භවා සබ්බෙ සමූහතා,
නාගොව බන්ධනං ඡෙත්වා විහරාමි අනාසවො.

6370. ස්වාගතං වත මෙ ආසි බුද්ධසෙට්ඨස්ස සන්තිකෙ,
තිස්සො විජ්ජා අනුප්පත්තා කතං බුද්ධස්ස සාසනං.

6371. පටිසම්භිදා චතස්සො ච විමොක්ඛා පි ච අට්ඨිමෙ,
ඡළභිඤ්ඤා සච්ඡිකතා කතං බුද්ධස්ස සාසනං.

6372. නිබ්බුතෙ කකුසන්ධස්මිං බ්රාහ්මණස්මිං වුසීමති,
ගහෙත්වා සලලං මාලං මණ්ඩපං කාරයිං අහං.

6373. තාවතිංසං ගතො සන්තො ලභිම්හ ව්යම්හමුත්තමං,
අඤ්ඤෙ දෙවෙ’තිරොචාමි පුඤ්ඤකම්මස්සිදං ඵලං.

6374. දිවා වා යදි වා රත්තිං චඞ්කමන්තො ඨිතො චහං,
ඡන්නො සලලපුප්ඵෙහි පුඤ්ඤකම්මස්සිදං ඵලං.

6375. ඉමස්මිං යෙව කප්පම්හි යං බුද්ධම්හිපූජයිං,
දුග්ගතිං නාභිජානාමි බුද්ධපූජායිදං ඵලං.

6376. කිලෙසා ඣාපිතා මය්හං භවා සබ්බෙ සමූහතා,
නාගො’ව බන්ධනං ඡෙත්වා විහරාමි අනාසවො.

6377. ස්වාගතං වත මෙ ආසි බුද්ධසෙට්ඨස්ස සන්තිකෙ,
තිස්සො විජ්ජා අනුප්පත්තා කතං බුද්ධස්ස සාසනං.

6378. පටිසම්භිදා චතස්සො ච විමොක්ඛා පි ච අට්ඨි’මෙ,
ඡළභිඤ්ඤා සච්ඡිකතා කතං බුද්ධස්ස සාසනං.