6217. පදුමුත්තරො නාම ජිනො සබ්බධම්මෙසු චක්ඛුමා,
ඉතො සතසහස්සම්හි කප්පෙ උප්පජ්ජි නායකො.

6218. සරණගමනෙ කඤ්චි නිවෙසෙති තථාගතො,
කඤ්චි සීලෙ නිවෙසෙති දසකම්මපථුත්තමෙ.

6219. දෙති කස්සචි සො වීරො සාමඤ්ඤඵලමුත්තමං,
සමාපත්ති තථා අට්ඨ තිස්සො විජ්ජා පවෙච්ඡති.

6220. ඡළභිඤ්ඤාසු යොජෙති කඤ්චි සත්තං නරුත්තමො,
දෙති කස්සචි සො නාථො චතස්සො පටිසම්භිදා.

6221. බොධනෙය්යං පජං දිස්වා අසඞ්ඛෙය්යෙ පි යොජනෙ,
ඛණෙන උපගන්ත්වාන විනෙති නරසාරථි.

6222. තදාහං හංසවතියං අහොසිං බ්රාහ්මණත්රජො,
පාරගූ සබ්බවෙදානං වෙය්යාකරණසම්මතො.

6223. නිරුත්තියා ච කුසලො නිඝණ්ටුම්හි විසාරදො,
පදකො කෙටුභවිදූ ඡන්දොවිචිතිකොවිදො.

6224. ජඞ්ඝාවිහාරං විවරං හංසාරාමමුපෙච්චහං,
අද්දසං වදතං සෙට්ඨං මහාජනපුරක්ඛතං.

6225. දෙසෙන්තං විරජං ධම්මං පච්චනීකමතී අහං,
උපෙත්වා තස්ස වාක්යානි සුත්වාන විමලානහං.

6226. ව්යාහටං පුනරුත්තං වා අපත්ථං වා නිරත්ථකං,
නාද්දසං තස්ස මුනිනො තතො පබ්බජිතො අහං.

6227. න චිරෙනෙව කාලෙන සබ්බසත්ථවිසාරදො,
නිපුණො බුද්ධවචනෙ අහොසිං ගණිසම්මතො.

6228. තදා චතස්සො ගාථායො ගන්ථයිත්වා සුව්යඤ්ජනා,
සන්ථවිත්වා තිලොකග්ගං දෙසයිස්සං දිනෙ දිනෙ.

6229. විරත්තොසි මහාවීර සංසාරෙ සභයෙ වසං,
කරුණාය න නිබ්බායි තතො කාරුණිකො මුනි.

6230. පුථුජ්ජනොව යො සන්තො න කිලෙසවසො අහු,
සම්පජානො සතියුත්තො තස්මා එසො අචින්තියො.