6247. ඉමම්හි භද්දකෙ කප්පෙ බ්රහ්මබන්ධු මහායසො,
කස්සපො නාම නාමෙන උප්පජ්ජී වදතං වරො.

6248. තදාහං චන්දනො චෙව පබ්බජිත්වාන සාසනෙ,
ආපාණකොටිකං ධම්මං පූරයිත්වාන සාසනෙ-

6249. තතො චුතා සන්තුසිතං උපපන්නා උභො මයං.
තත්ථ දිබ්බෙහි නච්චෙහි ගීතෙහි වාදිතෙහි ච-

6250. රූපාදිදසහඞ්ගෙහි අභිභොත්වාන සෙසකෙ,
යාවතායුං වසිත්වාන අනුභොත්වා මහාසුඛං-

6251. තතො චවිත්වා තිදසං චන්දනො උපපජ්ජථ,
අහං කපිලවත්ථුස්මිං අහොසිං සාකියත්රජො.

6252. යදා උදායිථෙරෙන අජ්ඣිට්ඨො ලොකනායකො,
අනුකම්පිය සක්යානං උපෙසි කපිලව්හයං.

6253. තදාතිමානිනො සක්යා න බුද්ධස්ස ගුණඤ්ඤුනො,
පනමන්ති න සම්බුද්ධං ජාතිත්ථද්ධා අනාදරා.

6254. තෙසං සඞ්කප්පමඤ්ඤාය ආකාසෙ චඞ්කමී ජිනො,
පජ්ජුන්නො විය වස්සිත්ථ පජ්ජලිත්ථ යථා සීඛි.

6255. දස්සෙත්වා රූපමතුලං පුන අන්තරධායථ,
එකොපි හුත්වා බහුධා අහොසි පුනරෙකකො.

6256. අන්ධකාරං පකාසං ච දස්සයිත්වා අනෙකධා,
පාටිහීරං කරිත්වාන විනයී ඤාතකෙ මුනි.

6257. චාතුද්දීපො මහාමෙඝො තාවදෙ සම්පවස්සථ,
තදා හි ජාතකං බුද්ධො වෙස්සන්තරමදෙසයි.

6258. තදා තෙ ඛත්තියා සබ්බෙ නිහන්ත්වා ජාතිජං මදං,
උපෙසුං සරණං බුද්ධං - ආහ සුද්ධොදනො තදා:

6259. ඉදං තතියං තව භූරිපඤ්ඤ
පාදානි වන්දාමි සමන්තචක්ඛු,
යදා’භිජාතො පඨවිං පකම්පයි
යදා ච තං නජ්ජහි ජම්බුඡායා.

6260. තදා බුද්ධානුභාවං තං දිස්වා විම්හිතමානසො,
පබ්බජිත්වාන තත්ථෙව නිවසිං මාතුපූජකො.

6261. චන්දනො දෙවපුත්තො මං උපගන්ත්වාන’පුච්ඡථ,
භද්දෙකරත්තස්ස තදා සංඛෙපවිත්ථාරනයං.

6262. චොදිතොහං තදා තෙන උපෙච්ච නරනායකං,
භද්දෙකරත්තං සුත්වාන සංවිග්ගො වනමාමකො.

6263. තදා මාතරමාපුච්ඡිං වනෙ වච්ඡාමි එකකො,
සුඛුමාලොති මෙ මාතා වාරයි තං තදා’වචං:

6264. දබ්බං කුසං පොටකිලං උසීරං මුඤ්ජබබ්බජං,
උරසා පනුදිස්සාමි විවෙකමනුබ්රූහයං.

6265. තදා වනං පවිට්ඨොහං සරිත්වා ජිනසාසනං,
භද්දෙකරත්තඔවාදං අරහත්තමපාපුණිං.

6266. අතීතං නාන්වාගමෙය්ය නප්පටිකංඛෙ අනාගතං,
යදතීතං පහීනං තං අප්පත්තඤ්ච අනාගතං.

6267. පච්චුප්පන්නඤ්ච යො ධම්මං තත්ථ තත්ථ විපස්සති,
අසංහීරං අසංකුප්පං තං විද්වා අනුබ්රූහයෙ.