6187. පදුමුත්තරො නාම ජිනො සබ්බධම්මෙසු චක්ඛුමා,
ඉතො සතසහස්සම්හි කප්පෙ උප්පජ්ජි නායකො.

6188. නායකානං වරො සත්ථා ගුණාගුණවිදූ ජිනො,
කතඤ්ඤූ කතවෙදී ච තිත්ථෙ යොජෙති පාණිනො

6189. සබ්බඤ්ඤුතෙන ඤාණෙන තුලයිත්වා දයාසයො,
දෙසෙති පවරං ධම්මං අනන්තගුණසඤ්චයො.

6190. ස කදාචි මහාවීරො අනන්තජනසංසදි,
දෙසෙති මධුරං ධම්මං චතුසච්චුපසංහිතං.

6191. සුත්වාන තං ධම්මවරං ආදිමජ්ඣන්තසොභනං,
පාණසතසහස්සානං ධම්මාභිසමයො අහු.

6192. නින්නාදිතා තදා භූමී ගජ්ජිංසු ච පයොධරා,
සාධුකාරං පවත්තෙසුං දෙවබ්රහ්මනරාසුරා.

6193. අහො කාරුණිකො සත්ථා අහො සද්ධම්මදෙසනා,
අහො භවසමුද්දම්හි නිමුග්ගෙ උද්ධරී ජිනො.

6194. එවං පවෙදජාතෙසු සනරාමරබ්රහ්මසු,
කුලප්පසාදකානග්ගං සාවකං වණ්ණයී ජිනො.

6195. තදාහං හංසවතියං ජාතොමච්චකුලෙ අහුං,
පාසාදිකො දස්සනීයො පහූතධනධඤ්ඤවා.

6196. හංසාරාම මුපෙච්චාහං වන්දිත්වා තං තථාගතං,
සුණිත්වා මධුරං ධම්මං කාරං කත්වා ච තාදිනො.

6197. නිපච්ච පාදමූලෙහං ඉමං වචනමබ්රවිං,
කුලප්පසාදකානග්ගො යො තයා සන්ථුතො මුනෙ.

6198. තාදිසො හොමහං වීර බුද්ධසෙට්ඨස්ස සාසනෙ,
තදා මහාකාරුණිකො සිඤ්චන්තො’වාමතෙන මං. -

6199. ආහ මං පුත්ත උත්තිට්ඨ ලච්ඡසෙ තං මනොරථං,
කථං නාම ජිනෙ කාරං කත්වාන විඵලො සියා.

6200. සතසහස්සෙ ඉතො කප්පෙ ඔක්කාකකුසලම්භවො,
ගොතමො නාම නාමෙන සත්ථා ලොකෙ භවිස්සති.

6201. තස්ස ධම්මෙසු දායාදො ඔරසො ධම්මනිම්මිතො,
උදායි නාම නාමෙන හෙස්සති සත්ථු සාවකො.

6202. තං සුත්වා මුදිතො හුත්වා යාවජීවං තදා ජිනං,
මෙත්තචිත්තො පරිචරිං පච්චයෙහි විනායකං.

6203. තෙන කම්මවිපාකෙන චෙතනාපණිධීහි ච,
ජහිත්වා මානුසං දෙහං තාවතිංසමගච්ඡහං.

6204. පච්ඡිමෙ ච භවෙ’දානි රම්මෙ කාපිලවත්ථවෙ,
ජාතො මහාමච්චකුලෙ සුද්ධොදනමහීපතෙ.

6205. යදා අජායි සිද්ධත්ථො රම්මෙ ලුම්බිනිකානනෙ,
හිතාය සබ්බලොකස්ස සුඛාය ච නරාසභො.